Дуҫлыҡ турниры илһөйәрлекте данланы

Кисә “Динамо” стадионында Рәсәй көнөнә арналған иптәштәрсә футбол турниры үткәрелде.

Сарала дәүләт хеҙмәткәрҙә­ренең “Ватан” футбол клубы, хәрби хәрәкәттәрҙә ҡатнашыусыларҙың “Шурави” ойошмаһы, Евразия ха­лыҡтары ассамблеяһының Баш­ҡортостан Республикаһындағы вә­киллегенең “Z” командаһы вәкилдәре ҡатнашты.

– Евразия халыҡтары ас­самблея­һының Башҡортостан Республика­һындағы вәкиллеге Европа һәм Азия илдәре менән мәҙәни һәм эшлекле бәйләнештәргә генә түгел, спорт үҫешенә лә иғтибар бүлә. Был сара милләттәр сәлә­мәтлегенә ыңғай йоғонто яһаған сәләмәт тормош менән физик культураны популяр­лаштырыуға булыш­лыҡ итә. Ошо мөһим йүнәлеш илебеҙҙең милли стратегияһына ҡарай, – тип белдерҙе сара алдынан вәкиллек етәксеһе, Башҡорт­остан Хөкүмәте Премьер-министры Андрей Назаров.

 – “Ватан” футбол клубының тарихына өсөнсө тиҫтә йыл инде. Был осорҙа бихисап йолаларыбыҙ барлыҡҡа килде. Уларҙың береһе – Рәсәй көнөнә арналған иптәштәрсә футбол турнирын ойоштороу,  – тине “Ватан” футбол клубы президенты, республиканың Дәүләт Йыйылышы – Ҡоролтай рәйесе урын­баҫары Рөстәм Әхмәҙинуров.

– Өфөләге футбол һөйөүселәр лигаһы 100-ҙән ашыу команданы үҙ эсенә ала, һәм был сик түгел. Футбол әүҙем һәм спорт яратҡан дәүләт, муниципаль хеҙмәткәрҙәрҙе бер­ләш­терә. Был байрамды – дуҫтар турнирын – ойоштороуға шатбыҙ, – тине “LigaFull” етәксеһе Александр Коршунов.

“Шурави” командаһы Башҡорт­остан һәм Рәсәй ветерандары беренселектәре финалдарында ҡатнаша, республикабыҙ йәштә­рендә илһөйәрлек һәм сәләмәт тормошто пропагандалау буйынса ҙур эш алып бара. Эшмәкәрлегебеҙҙә Баш­ҡортостанда спорт өлкәһендә социаль әһәмиәтле проекттарҙы тор­мошҡа ашырған ойошмаларҙың ярҙамын тоябыҙ, – тип үҙ фекере менән бүлеште команда капитаны Михаил Горбунов.

Турнирҙы Өфөләге Футбол һө­йөү­селәр лигаһы (“LigaFull”),  Евразия халыҡтары ассамблеяһының Баш­ҡортостан Республикаһындағы вәкиллеге  ярҙамында “Ватан”, “Шурави” футбол клубтары ойошторҙо.

Айһылыу НИЗАМОВА