Атайым һәр саҡ хуплап торҙо

Ишембай нефть колледжында студенттарға төрлө яҡлап үҫергә мөмкин, тигәнгә  йәнә инандыҡ. Был уҡыу йорто шәп көрәшселәре менән дан тота. Бында уҡырға килгән егеттәрҙе туплап, уларҙы рухи яҡтан да, физик яҡтан да үҫтерәләр.

Яңыраҡ барғаныбыҙҙа нефть колледжында милли көрәш буйынса тренер Айнур Кинйәбаев менән күрешеү форсаты тейҙе. Ошо уҡыу йортон тамамлап, эшкә лә бында тороп ҡала ул. Бер ыңғайҙа физкультура колледжында ла белем ала.

–Үҙем Стәрлебаш районының Ҡабаҡуш ауылында тыуып үҫтем. Атайым да, олатайым да заманында көрәш менән шөғөлләнде. Олатайым грек-рим көрәше буйынса Башҡортостан чемпионы булған, атайым һабантуйҙарҙа көрәшә ине. Шуға мин дә I кластан уҡ көрәшкә ылыҡтым. Атайым  был шөғөлөмдө хупланы, һәр ваҡыт ярҙам итте. Ауылда спорт менән шөғөлләнер өсөн көслө уҡытыусылар ҙа булды. Мансур Һөйәрғолов гер күтәреү, көрәш түңәрәктәрен алып барҙы. Уның етәкселегендә унлап гер күтәреү буйынса спорт мастерҙары, шул сама көрәш буйынса спорт мастерҙары әҙерләнде. VII класҡа тиклем ауылда шөғөлләндем, аҙаҡ беҙҙән 25 километр йыраҡлыҡта ятҡан район үҙәгенә көрәш секцияһына йөрөй башланым. Унда тренерым Илдар Моратов булды. Мәктәптә уҡығанда уҡ көрәш буйынса ярыштарҙа Башҡортостан, Рәсәй чемпионы тигән исемде алдым.  Ишембай нефть колледжына килгәс тә был шөғөлөмдө дауам иттем. Бында  көрәш буйынса көслө тренар Марат Зарипов ҡаршы алды, – тине Айнур Илнур улы.

Ишембай нефть колледжында милли көрәш буйынса секцияны 2021 йылдан алып бара. Әлеге көндә уның ҡарамағында 50-нән ашыу егет шөғөлләнә. Улар араһында донъя кимәлендә чемпион исемен яулағандар, призлы урындарға эйә булғандар бар. Былар барыһы ла тырышлыҡтың бушҡа китмәүе тураһында һөйләй. Был спорт төрөн үҫтереү өсөн шарттар тыуҙырылыуын да билдәләне тренер.

–Беҙгә уҡырға килгән ауыл егеттәрен көрәш секцияһына йәлеп итеүебеҙ, уларҙың үҙҙәре өсөн дә отошло. Көрәш – физик яҡтан ғына түгел, рухи яҡтан да нығыта, үҙҙәренә ышанысты арттыра. Йәштәрҙе үҫтереү өсөн уларға ваҡытында дөрөҫ йүнәлеш биреү ҙә мөһим, – тине тренер.

Бәлки секцияға йөрөүсе егеттәрҙең киләсәктә барыһы ла шәп көрәшсе лә булып китмәҫ, ләкин был спорт төрөнөң уларҙа ныҡышмаллыҡ, ышаныс тәрбиәләүе, рухтарын нығытыуы  ғүмер  буйына  кәрәк буласаҡ.

Ишембай нефть колледжында яҡшы белгестәрҙе генә әҙерләп ҡалмай, төрлө яҡлап үҫеү өсөн  мөмкинлектәрҙең булдырылыуы йәмғиәтебеҙ өсөн кәрәкле кешеләр тәрбиәләүҙе тәүге маҡсат итеп ҡуя. 

Автор фотоһы.

Ишембай ҡалаһы.