Бөтә яңылыҡтар
Йәмғиәт
24 Май 2019, 15:55

Беҙ был донъяла ҡунаҡ ҡына...

Бер көн редакциябыҙ ишеген ғәҙәти булмаған ҡунаҡ ҡаҡты: – Шиғыр алып килгәйнем...

Бер көн редакциябыҙ ишеген ғәҙәти булмаған ҡунаҡ ҡаҡты:

– Шиғыр алып килгәйнем...


Ғәҙәти хәл, тиерһегеҙ, бәлки. Ижад емештәре менән йомарт бүлешкән гәзит уҡыусыла­рыбыҙ, шөкөр, байтаҡ. Башҡорт­остандың төрлө райондарынан шиғри хаттар даими килеп тора. Ә бына үҙен Рәзилә Батыршина тип таныштырған авторыбыҙҙы тыуған төйәге Ҡырмыҫҡалы районының Ҡарлыман ауылында йәшәгән ауылдаштарының яҙмышы борсой икән.


– Ауылда эскелек күренеш­тәре бар. Элек фермаларҙа алдынғы һауынсы булып гөрләтеп эшләп йөрөгән ҡатындарға тиклем хәҙер ошо афәт һаҙлығына сумған. Быны күреп, йөрәк әрней. Яңыраҡ йәшел йылан менән дуҫ булған бер егеткә тыуған көнө айҡанлы шиғыр арнаным да үҙенә уҡып ишеттерҙем. Илап ебәрҙе! “Миңә лә шиғыр арнарҙар икән”, – тине. Ҡатыны һөйләүенсә, бер аҙна инде хәмерҙе ауыҙына алғаны юҡ.


Беҙ бит был донъяла ҡунаҡ ҡына. Бер-беребеҙҙең ҡәҙерен белеп, ярҙам ҡулы һуҙып, тормошто яратып, ниндәй генә ауырлыҡтар килһә лә, төшөн­көлөккә бирелмәй, тирә-яҡтағы кешеләрҙе хөрмәт итеп йәшә­йексе. Аҡыллы шағирҙар әйт­меш­ләй, теге донъяла бер-беребеҙгә йөрөргә юлдар юҡ, Ер-әсәнән тыуҙыҡ, Ер-әсә ҡуйы­нына инеп ятасаҡбыҙ, – тине ул һәм ауылдаштарына, тыуған Ҡарлыманына арналған шиғы­рын тапшырып сығып китте.


61 йәшлек пенсионер апай­ҙың яҡташтарының яҙмышы өсөн янып-көйөп йөрөүе, республика баҫмаһы аша мөрәжә­ғәт итеп, уларҙы дөрөҫ юлға баҫтырырға тырышыуы ҡыуан­дыра. Үҙенә шиғыр арнағандан һуң эскелектән бер аҙ арынған, беҙгә исеме билдәһеҙ ағай тураһындағы ваҡиға арҡылы шиғри һүҙҙең тылсымлы көсө уйға һала...



Ҡарлыманым


Әллә ниңә был яҙмыш

Айыра тыуған ерҙән.

Мөхәббәт тулы йырҙарҙан,

Тәпәй баҫҡан сиҙәмдән.


Ҡарлыманым, Ҡарлыманым,

Һағындыра ҡырҙарың,

Тау артында алһыуланып

Һыҙылып атҡан таңдарың.


Бики күленән һыу эстем дә

Туғайҙарың буйланым,

Ослоҡай тауыңды үрләп,

Йөрәк йырым йырланым,

Ауылым, Ҡарлыманым...


Ҡырмыҫҡалы районы,

Ҡарлыман ауылы.