Балаларҙың шат тауышы тынмаһын

Баймаҡ ҡалаһының ял һәм мәҙәниәт паркында көн буйы йыр-моң, уйын-көлкө, кескәйҙәрҙең шат тауыштары яңғырап торҙо. Бында балалар өсөн ысын мәғәнәһендә байрам ойошторолдо. Сара бер нисә майҙанда бер юлы барҙы: кемдер спорт ярыштарында ҡатнашһа, икенселәр оҫталыҡ дәресе алды. “Алло, беҙ таланттар эҙләйбеҙ!” конкурсында ҡатнашыусылар бигерәк күп булды – һәр бала үҙенсә талантлы.

Халыҡ-ара балаларҙы яҡлау көнөнә арналған сарала ата-әсәләр комитеты, атайҙар ҡоро, “Өмөт” клубы ағзалары, тәрбиәгә алынған балалар һәм башҡалар ҡатнашты. Сәләмәтлек мөмкинлектәре сикләнгәндәр өсөн ойошторолған һабантуйҙа һәр кем үҙенсә күңел асты, кәйефен күтәрҙе, йырлап-бейене.

Йәйге каникулды малай-ҡыҙҙар яҡты, сағыу тәьҫораттар менән ҡаршы алды, яңы дуҫтар тапты.