Бурысын түләмәҫ өсөн...

2017 йылда был кеше бизнесын үҫтереү өсөн танышынан 1 миллион һум аҡса алып тора. 2018 йылда, бурысын ҡайтармаҫ өсөн, аҡса биреп тороусынан ҡотолорға уйлай. Үҙе һатҡан ҡоролманы күрһәтәм тигән булып, уны осрашыуға саҡыра. Осрашыу урынына килгәс, был әҙәм эшҡыуарҙың башына бейсбол таяғы менән һуға, шунан аяҡ-ҡулын тимер сым менән бәйләп, башына пакет кейҙерә, ә кәүҙәһен скотч менән урай. Кәүҙәне үҙ машинаһында Туймазы районына сығарып, юл буйына ташлап китә.

Башҡортостан тәфтиш комитетының матбуғат хеҙмәте хәбәр итеүенсә, эшҡыуарҙың дуҫтары иртәгәһенә үк уның юғалыуы тураһында полицияға хәбәр итә. Тәртип һаҡсылары ирҙең аралашыу даирәһен тикшереп, шунда уҡ енәйәтсенең эҙенә төшә. Ирҙең автомобилен тикшергәндә үлтереү ҡоралы ла табыла, ҡан эҙҙәре лә юйылмаған була. Бынан тыш, тиҙҙән эшҡыуарҙың кәүҙәһе лә табыла.

Бәләбәй кешеһенең тағы бер енәйәте асыла: 2017 йылдың ноябрендә ул эшкә ҡушҡан хеҙмәткәр менән талашып китә һәм уны бик ныҡ туҡмай, әммә дәлилдәрҙең куплегенә ҡарамаҫтан, ғәйебен тана. Ҡырын эш ҡырҡ йылдан һуң да беленә тигәндәй, был эштең дә осо сыҡты.