Инспекторҙы ҡулынан тота ла газға баҫа...

Кисә кис полицияның өлкән лейтенанты хеҙмәтен тамамлап ҡайтып килгәндә, урындағы магазин ишеген ҡаплап ултырған машинаға иғтибар итә. Уның эсендәге ике ирҙең үҙҙәрен бигерәк ҡыҙыу тотоуын күрә һәм водитель яғынан яндарына бара. Алкоголь эҫе әллә ҡайҙан аңҡып торған ирҙән водитель танытмаһын күрһәтеүҙе талап итә. Тегенеһе инспекторҙы ҡулынан эләктереп ала ла газға баҫа...

Автомобиль полиция хеҙмәткәрен әллә нисәмә метр һөйрәп алып бара. Ир туҡтап торған йөк машинаһы алдына йығыла. Көсөн йыйып хеҙмәттәштәренә шылтырата һәм автомобилдең номерҙарын әйтә ала.

Саҡ ҡына һуңғараҡ машинаны Рәсәй урамында табалар. Иҫерек водитель дә ҡулға алына. Асыҡланыуынса, ул ике йылға танытмаһынан ҡолаҡ ҡаҡҡан булған.

Әле уға ҡарата административ протокол төҙөлгән. Енәйәт эше ҡуҙғатыу мәсьәләһе хәл ителә.

Йәрәхәтләнгән инспекторҙы иһә дауаханаға алып баралар. Ярҙам күрһәткәндән һуң ул өйөнә ҡайтарылған.