Үҙе лә бал ҡортондай тырыш

Таймаҫта ғына түгел, тирә-яҡ ауылдарҙа ла, районда ла Салауат Солтангәрәевте бел­мә­гән, ихтирам итмәгән кеше юҡтыр. Уның бар ғүмере ошо тыуған ере, тыуған тупрағынан айырылғыһыҙ.

Муса ағай менән Миңһылыу апай алты балаға ғүмер бирә. Салауат – араларында иң оло­һо. Шуға күрә бәләкәйҙән уға туғандарын ҡарашырға, уларҙы ашатып-эсерер, кейендерешер өсөн йәйге каникулдарында совхоздың ураҡ эштәрендә комбайнсы ярҙамсыһы булып эш­ләр­гә тура килә. Үҫмер, үҙенең ки­ләсәкке тормошо техника ме­нән бәйле икәнен аңлап, трак­торсыға уҡып сыға, шунан ту­ған совхозында эшләй башлай.

Тормош тигәнең уйын түгел, ул беҙҙе көтөлмәгән ваҡиғалары менән дә шаңҡыта һуға ҡайһы саҡта. Бер көн Муса ағай фажиғәле рәүештә вафат була… Инде хәҙер ғаилә баш­лығы вазифаһын Салауат үҙ өҫтөнә ала, әсәһенең төп ярҙам­сыһына әйләнә. Ҡусты-һең­леләрен аяҡҡа баҫтырыуҙа, кеше итеүҙә күп эшләргә, бихисап көс һалырға тура килә уға. Был маҡсатына ирешеүҙә уның хеҙмәт яратыуы, уңғанлығы бигерәк тә ныҡ ярҙам итә.

Хеҙмәт ваҡытын тултырып ҡайтҡас, совхозда механизатор булып эшләүен дауам итә. Салауат намыҫлы хеҙмәте өсөн күп тапҡыр Почет грамоталары менән бүләкләнә, юллама менән сит илгә барып ял итеп тә ҡайта. 1978 йылдағы ураҡ эштәрендәге юғары хеҙмәт күрһәткестәре өсөн ул “Ураҡ эштәре батыры” исеменә лайыҡ булып, еңел автомобиль менән бүләкләнә.

Ауыл мәктәбенә педагогия институты тамамлаған Гөлсөм исемле математика уҡытыусы­һы эшкә килә. Салауат менән йәш мөғәллимә бер-береһен яратып, ғаилә ҡороп ебәрә. Юлай исемле ул, Зөлфиә исемле ҡыҙ тәрбиәләп үҫтерәләр.

Салауат Муса улы – бик тә изге күңелле кеше, бар йәшәү мәғәнәһе – ауылдаштарына яҡшылыҡ ҡылыу, ярҙам ҡулы һуҙыу, уларҙы бәхетле итеүгә бәләкәй генә булһа ла үҙ өлөшөн индереү. Тап бына шул күркәм сифаттары уны баҫыуҙан мәктәпкә алып килә лә инде: 1986 йылдан алып Салауат Муса улы Таймаҫ урта мәктәбендә хеҙмәт дәрестәрен уҡыта башлай. Йәш быуынға хеҙмәт тәрбиәһе биреүгә бар күңелен һала ул. Был йәһәттән белемен арттырыу маҡсатында Сибай педагогия училищеһына уҡырға инеп, уны уңышлы тамамлай. Балаларға техника нигеҙҙәрен уҡытыу менән бер рәттән, уларҙы ағас эштәренә лә өйрәтә, үҙе лә өйрәнә. Оҫта эшләй-эшләй оҫтара тигәндәй, тора-бара үҙе лә ағас эше оҫтаһына әйләнә. Уҡыусылары менән бергәләп әҙерләгән, ағастан юнып, һырлап, биҙәп яһа­ған эштәре менән район күргәҙмәләрендә даими ҡат­наша. Мәктәп биләмәһендә уҡыу­сылары менән ултыртҡан ағас­тар әле лә бар тирә-яҡты йәм­ләй.

Уҡытыусыларының урынлы кәңәштәре, ярҙамы, хәстәрлеге арҡаһында Таймаҫ мәктәбенең күпме уҡыусыһы күңеленә ятышлы һөнәр һайлай! Әле лә кәңәш һорарға, хәлен белергә, ағас буйынса яңы эштәре менән танышырға өҙлөкһөҙ килеп торалар. Ысын бәхет бына шул була инде! Үрмәксенән күрмәксе тигәндәй, Юлай менән Зөлфиә лә ата-әсәләренең һөнәри юлын һайлай, ысын бәхеттәрен уҡытыусы хеҙмәтендә таба.

Уңған кеше уңған кеше инде. Салауат Муса улы менән хәләл ефете Гөлсөм Ғәбиҙулла ҡыҙы донъяларын да сынъяһау итеп тота. Уларҙың йортона, ихатаһына һоҡланып туйғыһыҙ. Йорт хужаһы ана бөгөн дә ейәнен эйәртеп алған да уны умартасылыҡ эштәренә өйрәтә. Уңған бал ҡортолай икәүләшеп мәж килә олатай менән ейән…