“Йә, хәҙер әйтегеҙ әле: беҙ ҡайҙан?”

Спорт менән шөғөлләнәләр, үҙҙәрен сыныҡтыралар, секцияға йөрөп, ҡул һуғышы серҙәрен үҙләштерәләр, йәғни ысын десантсы булырға әҙерләнәләр. Хыялдары тормошҡа аша, етмәһә, учебкаға бергә эләгәләр.

...Уҙған быуаттың 90-сы йылдары башы. Был ике башҡорт егетендә рух та, көс тә ташып тора. “Һеҙ ҡайҙан?” тигән һорауға ғорур рәүештә: “Башҡортостандан!” – тип яуаплайҙар. Шул саҡ ҡырҡ ерҙән йыйылған һалдаттар араһынан кемдер: “Ниндәй Башҡортостан булһын! Ғүмер буйы Башкирия булды”, – ти мыҫҡыллы итеп.

Уға тағы бер нисәү ҡушыла, йәнәһе, суверенитет алып, килештереп ебәрәһегеҙ. Был ике башҡортҡа шул һүҙ етә ҡала: күҙ асып йомғансы үҙҙәренән көлгән бер нисә егетте ергә һуҙып һалалар. Унан башҡаларҙың янына килеп: “Беҙ ҡайҙан?” – тип һорайҙар. Ҡурҡыуынан дер ҡалтырап төшкән һалдаттар бер-береһен бүлеп яуаплай: “Башҡортостандан! Башҡортостандан!..”