+15 °С
Облачно
Йәмғиәт
30 Октября 2019, 12:37
"Кеше көлдөрөп тормам инде"
– Нимә тип эсәһең инде, ҡустым! Был һүҙҙе уға нисә тапҡыр ҡабатлағанымды үҙем дә иҫләмәйем.
Фото: irishtimes.com
– Нимә тип эсәһең инде, ҡустым!
Был һүҙҙе уға нисә тапҡыр ҡабатлағанымды үҙем дә иҫләмәйем. Күргән һайын һалмыш, осраған һайын “үлеп бара”. Сәбәбен дә табып тора.
– Эй, ағай, бөгөн шунса ғына эш хаҡы алдым. Йә, шул хәйерсе аҡсаһына нисек йәшәмәк кәрәк! Асыуҙан эстем дә ҡуйҙым! Юҡ, бүтән грамм эсәйем!
Ике аҙна элек ҡайтҡанда ла “егет булғайны”.
– Һин, ағай, мине гелән шулай йөрөй тип уйлайһыңмы? Юҡ! Бисәкәйгә йән көйөп инде. Юҡ, ошонан башҡа ауыҙға тамсы ла алмайым. Бына икмәк тотоп ант итәм.
– Мин һиңә хәҙер ышанмайым!
– Һин нимә, ағай! Мине бөтөнләй бөткән кеше тип уйлайһыңмы? Алкаш тип уйлайһыңмы?! – Ул ярһып китә.
Кисә йәнә уны күрҙем. Йөҙө ҡарағыһыҙ булып шешенгән, төҫө ҡасҡан.
– Уй, ағай, кисә ауылда берәүгә нигеҙ ҡорғайныҡ. Шунда бөтәһе эскәндә нисек инде суфый кеше һымаҡ тормаҡ кәрәк. Кеше көлдөрөп тормам инде. Эстем дә ҡуйҙым. Күп түгел инде.
Ҡустым минең күҙгә мөлдөрәп баҡты.
– Шуға бөгөн баш аҡтарылып бирә. Баш төҙәтергә берәй йөҙ һум аҡса биреп кенә тор әле. Башҡаса ауыҙға ла алмайым бына. Икмәк тотоп ант итәм.
