Республиканың халыҡ участковыйы – Әбйәлилдән

Граждандарҙың хәүефһеҙ­леген, тыныс тормошон тәьмин итеп, йәмәғәт хәүеф­һеҙлеге һағында торған участка уполномоченныйҙарының эше күҙгә салынмаһа ла, уларҙың хеҙмәте иртә таңдан ҡояш байығансы дауам итә, кәрәк саҡта төндә лә саҡырталар. Вәғиз Задин, йәш булһа ла, ауыр һәм яуаплы эшен урынына еткереп башҡара. Әле Әбйәлил районының 11 ауылындағы тәртипте күҙәтеү – уның һәм хеҙмәттәше Салауаттың иңендә. Улар бер-береһенә ярҙам итеп, иңгә-иң терәп, полиция алдына ҡуйылған бурысты намыҫлы башҡара.

Өлкән лейтенант Вәғиз Задин сығышы менән ошо райондан, шуға ла яҡташтары уны яҡшы белә. Көтөлмәгән хәл килеп тыуғанда, ярҙам кәрәк булғанда, халыҡ көн йә төн тип тормай, шунда уҡ уға мөрәжәғәт итә.

Полицияның өлкән участка уполномоченныйы Вәғиз Задинға Силәбе өлкәһендә лә эшләргә насип була. Әммә яҡташтарына файҙалыраҡ булыу теләге уны тыуған районына ҡайтыуға этәргән. Һәм ул быға һис тә үкенмәй. Өфөлә юғары юридик белем алғас, 2014 йылда полицияға эшкә килгән. Уның атаһы ла эске эштәр органдарында хеҙмәт иткән, шуға ла бала саҡтан был һөнәрҙең нескәлектәрен күреп, белеп үҫкән.

Вәғиз Задин тиҫтәләгән енәйәтте асыуға өлгәшкән. Әле ул көн дә халыҡ араһында иҫкәртеү эше алып бара, граждандарға енәйәт­селәрҙән һаҡланыу һәм үҙең­де яҡлау саралары хаҡында мәғлүмәт яҙылған хәтер дәфтәрҙәре тарата. Тәртип боҙоу осрағы булғанда, протокол төҙөй. “Беҙҙең тәртип һаҡлаусыбыҙ һәр саҡ ярҙамға килергә әҙер”, – тип уны маҡтап телгә ала ауылдаштары.

Вәғиз Задин эшендә өлгө­лө хеҙмәткәр булһа, өйөндә – ышаныслы ғаилә башлығы. Тормош иптәше Рәмилә менән ике бала тәрбиәләйҙәр. Тыл ныҡ булғас, ул ҡанат­ланып йөрөп эшләй. Ҡатыны иһә ире тыныс эшләһен өсөн шарттар тыуҙырырға тырыша: йорттарын бөхтә һәм йәнле итеп тәрбиәләп тора. Вәғиз иһә ауыр эшен тамамлағас, уны көтөп торған яҡындары янына ҡанатланып ҡайта. Әлегә балалары ниндәй һөнәр һайларға хәл итмәгән, әммә уларҙың үрнәк алыр кеше­ләре бар.

Вәғиз Задин Бөтә Рәсәй “Халыҡ участковыйы” конкурсында өсөнсө тапҡыр ҡатна­шырға батырсылыҡ иткән. Быйыл ул федераль этапҡа сығыуға өлгәште. Был конкурс 10 ноябргә тиклем дауам итә. Шуға ла яҡташыбыҙға еңеү яулауға ярҙам итә алабыҙ. Бының өсөн Башҡортостан буйынса Эске эштәр министр­лығы сайтына инеп, тауыш бирергә кәрәк.