“Атай-әсәй йөҙөнә ҡыҙыллыҡ килтермәнек”

Атаһы һуғыштан күҙ­ҙәрен юғал­тып, һуҡырайып ҡайта. Шулай ҙа балалары уның бер ҡасан тик ултыр­ғанын күрмәй. “Ҡулығыҙҙан китап төшмәһен, уҡығыҙ, – тип ҡабатларға яратҡан Нуретдин ағай дүрт ҡыҙы һәм дүрт улына. – Уҡымаһағыҙ, ишектәр ябыҡ булыр һеҙҙең өсөн”.

– Әсәйем китап тотоп ултырған балаһына эш ҡушмаҫҡа тырышыр ине. Ябай хеҙмәт кешеләре булыу­ҙарына ҡарамаҫтан, тәбиғи аҡылдары менән белемдең көс-ҡеүәтенә, тормошҡа путевка булыуына ата-әсәм ныҡ ышанды. Һуҡыр атайҙың һигеҙ балаһы ла уҡып кеше булды. Бишеһе юғары белем алды, ҡалғандары техникум тамамланы, – ти хеҙмәт ветераны.

Лира Әһәҙуллина Саҡ­мағош районының Рәжәп ауылында тыуып үҫкән. Тәүҙә уҡытыусы булып эш башлай, райондың комсомол, аҙаҡ партия комитеттарында, страховкалау компанияһында эшләй. Өфөләге Һаҡлыҡ банкының Совет районы бүлексә­һендә иҡтисадсы-финансист вазифаһын атҡара, Торлаҡ-төҙөлөш фондында эш хаҡы түләү системаһын булдырыуға ҙур көс һала. Был хеҙмәте өсөн министрлыҡтың Почет грамотаһына лайыҡ була.

Ғөмүмән, Лира Нуретдин ҡыҙы – бик тынғыһыҙ, эшһөйәр заттарҙың береһе, йәмәғәт эштәренең урта­һында ҡайнай. Коллектив ағзалары балаларының ялын ойоштора, һауыҡ­тырыу мәшәҡәттәрен үҙ өҫтөнә ала. Әле лә ул тик ятмай, КПРФ-тың Киров районы бүлегендә секретарь йөгөн тарта.

– Беҙҙең быуын иңенә ауырлыҡтар күп төшһә лә, үҙебеҙҙе бик бәхетле тип иҫәпләйем, Совет вла­сының хәстәрлеге арҡа­һында инвалид Нурет­диндең һигеҙ балаһы ла белемле, һөнәрле, эшле булды. Атай-әсәйҙең йөҙөнә ҡыҙыллыҡ килтермәнек, – ти хеҙмәт ветераны.