Яҡшы орлоҡтан – яҡшы нәҫел

Насар орлоҡтан яҡшы нәҫел көтмә, ти халыҡ мәҡәле. Бының менән бәхәс­ләшеп булмай. Шуға ла яҡшы уңыш алыу маҡ­сатын ҡуйған игенсе әленән хәстәрлек күрә.

Күп хужалыҡтарҙа яҙғы сәсеүгә, шулай уҡ һатыуға билдәләнгән орлоҡ материалын таҙартыу эше бара. Урындарҙа орлоҡтарҙы сортҡа айыралар, сәсеү кондицияһына еткерәләр. Ә сәсеүгә яраҡлылыҡ сифаты лаборатория шарттарында тикшерелә. Ниндәй сифатлы орлоҡтар һаҡла­ғысҡа һалыныуын алдан белеү мөһим. Һауаның түбән темпера­тура­һының орлоҡтарға кире йоғонто яһау ихтималын иғтибарҙан ситтә ҡал­дырырға ярамай, шуға күрә келәттәрҙә ашлыҡтың дымлылығын контролдә тоторға кәрәк, сөнки температура режимын үтәмәү орлоҡтарҙың шытыу­санлығына кире йоғонто яһарға мөмкин.

Буласаҡ уңышты планлаш­тыр­ғанда шуны иҫтә тоторға кәрәк: уңыш дәрәжә­һендә сорттың өлөшө 40–50 процент тәшкил итә, шуға күрә беҙҙең ерлек өсөн яраҡлаш­ҡандарын дөрөҫ һайлап алыу һәм ҡулланыу игенселектә ҙур әһәмиәткә эйә.

Тотороҡло уңыш алыу өсөн һәр ху­жалыҡта һәр культураның биологик һәм хужалыҡ өсөн файҙалы сифаттары менән бер-береһенән айырылып торған өс-дүрт сортын игеү яҡшы булыр ине, сөнки уларҙың һәр береһе, төрлө фак­торҙарға ҡарап, уңышты ла төрлөсә бирә. Сорт алмаштырыу һәм яңыртыу, элиталы орлоҡ­тар һайлап алыу һәм һатып алыу өсөн хужа­лыҡ­тарҙың мөмкинлектәре етерлек. Мөм­кинлектәре сикләнгән хужа­лыҡтар орлоҡтарын яҙғы сәсеүгә әҙер­ләй, сөнки кондициялы булмаған орлоҡ­тар сәсеү технологияларҙы тупаҫ боҙоу ғына түгел, матди ресурстарҙы һәм аҡсаны һөҙөмтәһеҙ файҙаланыуға тиң.

2020 йыл уңышына ныҡлы нигеҙ һалыу өсөн район буйынса 2510 тонна бойҙай, 920 тонна сабан арпа, 1102 тонна һоло, 50 тонна вика, 100 тонна борсаҡ, 60 тонна ҡарабойҙай, 10 тонна тары орлоғо кәрәк. Әлегә 4752 тонна һабан һәм ҡуҙаҡлы культуралар орлоҡтарға һайлап алып, тикшереү үткәрелгән.