Парктарҙы төҙөкләндереү дауам итә

Башҡортостан Башлығы Радий Хәбиров социаль селтәрҙәге сәхифәһендә 2022 йылда тормошҡа ашыра башлау күҙалланған бер нисә ҙур проектты телгә алды.

“Урамда яҙ тиерлек, һәм беҙҙең өсөн бик яуаплы көндәр башлана, май башында парктарҙы төҙөкләндереү һәм ихаталарҙы ремонтлау эштәренә тотонорға тейешбеҙ. Шуға күрә 2022 йылда тормошҡа ашыра башлау күҙалланған бер нисә ҙур проектты билдәләп үтәм.

Беренсенән. Быйыл халыҡҡа “Ҡашҡаҙан” паркын тапшырабыҙ. Ҡашҡаҙандың һыуын таҙарттыҡ, хәҙер унда һыу инергә мөмкин. Бының өсөн күл төбөн таҙартырға һәм тәрәнәйтергә, таҙартыу ҡоролмалары төҙөргә тура килде. Был проектҡа күп аҡса, күңел йылыһы, көс һалдыҡ. Йәнә ҡабатлап әйтәм, беҙ “Ҡашҡаҙан”ды Рәсәйҙә иң яҡшы парктарҙың береһенә әүерелдерергә тырышасаҡбыҙ. Һәм был паркты Өфө ҡалаһы көнөндә асабыҙ.

Икенсенән. Дим районы халҡы Үҙәк паркты тәртипкә килтереү үтенесе менән күп тапҡыр мөрәжәғәт иткәйне. Был эшкә тотондоҡ һәм йәй, көҙ айҙарында Дим халҡы парк сәнғәте хаҡындағы заманса күҙаллауҙарға тулыһынса тап килгән өр-яңы, төҙөк паркка эйә буласаҡ.

Өсөнсөнән. Хәтерегеҙҙәлер, мин тауыш биреү иғлан итеп, тәү сиратта ниндәй парктарҙы тәртипкә килтереү кәрәклеген һорағайным. Нефтехимиктар паркын тәртипкә килтереү өсөн бик күп тауыш бирҙеләр. Беҙ быйыл ошо эшкә тотонабыҙ. Паркты ике сиратта төҙөкләндерәбеҙ. Беренсе сиратта – парктың үҙен, уның йәшел өлөшөн, йыл аҙағына был эште атҡарып сығырбыҙ, тигән ниәттәбеҙ. Икенсе сиратты киләһе йылға планлаштырабыҙ – Нефтехимиктар мәҙәниәт һарайы алдындағы майҙанды һәм 8-се дауахана алдындағы скверҙы төҙөкләндерәбеҙ.

Барығыҙға ла хәйерле көн, эш дауам итә!” – тип яҙҙы Радий Хәбиров.

Фото: vk.com/wall413272232_762546

Сығанаҡ: vk.com/wall413272232_762546