Беҙҙең төбәк менән ҡыҙыҡһыналар

Бөгөн Ишембай районында, Торатау итәгендә, Рус география йәмғиәте төбәк бүлексәһенең попечителдәр советы ултырышы уҙҙы. Ултырышта бүлексәнең уҙған йылдағы эшенә йомғаҡ яһалды. Попечителлек советы ағзаларынан тыш, сарала муниципаль район хакимиәте башлыҡтары һәм Рус география йәмғиәте вәкилдәре ҡатнашты.

Сарала ҡатнашыусыларҙы Башҡортостан Башлығы Хаки­миәте етәксеһенең беренсе урынбаҫары Урал Килсенбаев сәләмләне. Ул ултырыштың ЮНЕСКО-ның глобаль геопарктар селтәренә инеүгә 16 дәғүә­сенең береһе булған “Торатау” геопаркында үтеүе осраҡлы түгеллеген һыҙыҡ өҫтөнә алды.

– Башҡортостан Хөкүмәте, ғилми берләшмә, Рус география йәмғиәтенең төбәк бүлексәһе лә “Янғантау” геопаркы ғари­за­һы өҫтөндә әүҙем эшләне. Шул рәүешле Рәсәйҙә ЮНЕСКО-­ның тәүге геопаркы барлыҡҡа килде. Бөгөн “Торатау” геопаркына бәйле ғариза буйынса ла бер төптән эшләргә кәрәк, – тип һыҙыҡ өҫтөнә алды Урал Килсенбаев.

Төбәк бүлексәһе рәйесе,     М. Аҡ­мулла исемендәге Баш­ҡорт дәүләт педагогия университеты ректоры Салауат Сәғи­тов уҙған йылда үҙе етәкләгән ведомство­ның Рус география йәмғиәте бү­лексәләре рейтингында икенсе урынды алыуын белдерҙе. Беҙҙән алда Краснодар крайы ғына. 

– Был уңышта бихисап структураларҙың, шул иҫәптән муниципалитеттарҙың һәм белем биреү учреждениеларының хеҙмәте ҙур. Республикабыҙ туристик маршруттарға бай, мә­ғри­фәтселек һәм мәғариф проекттарын ойошторабыҙ. Былтыр Рус география йәмғиәте тырыш­лығы менән Архангел райо­нын­дағы Асҡын мәмерйәһе терге­ҙелде, тип әйтергә мөмкин. Хәҙер Ғафури районындағы Киндерле мәмерйәһе менән шөғөлләнәбеҙ, – тип билдәләне Салауат Сәғитов.

Салауат Сәғитов 2021 йылда төбәк бүлексәһе тормошҡа ашырған проекттар һәм саралар хаҡында һөйләне. Йыл һа­йын ғәмәлдәге ағзалар һаны арта – 1 апрелгә Баш­ҡортос­тандың Рус география йәмғиә­тенә 342 кеше инә. Былтыр Урал спелеологтары съезы, “Рос­ток” йәштәр төбәк-ара ғил­ми-ғәмәли экология конфе­ренцияһы уҙғарылды, “Урал Ба­рыҫы”, “Башҡорт донъяһы”, “Аяҡ­тарым юлда, күңелем йыр­ҙа...” кеүек проекттар тормош­ҡа ашырылды. Эске туризмды үҫтереүгә булышлыҡ итеүҙән тыш, Рус география йәмғиә­тенең урындағы бүлексәһе экологик, аң-белем таратыу, мәға­риф һәм экспедиция эшмә­кәрлеге менән шөғөлләнә.   

Мәскәүҙән видеобәйләнеш аша ойошма эшенең төп йүнә­лештәре хаҡында Рус география йәмғиәте башҡарма дирек­цияһының Төбәк үҫеше департаменты директоры Дмитрий Цапенко һөйләне. Ә Шишмә ра­йоны хакимиәте башлығы Ришат Мансуров Турахан менән Хөсәйенбәк кәшәнәләрен терге­ҙеү барышы хаҡында хәбәр итте.

– Уҙған йыл йомғаҡтары буйынса Рус география йәмғиәте­нең Башҡортостандағы бүлексә­һе икенсе тип танылды, 2020 йылда беҙ илдең Рус география йәмғиәтенең иң яҡшы ун бүлек­сәһе иҫәбендә инек, ә унан бер йыл алда 14-се урынды биләй инек. Краснодар крайынан айыр­малы рәүештә, беҙҙә диң­геҙ юҡ. Әммә рифтар, тауҙар, уникаль тәбиғәт бар. Лидерҙар рәтендә нығыныу өсөн беҙгә ҡыҙыҡһынған кешеләрҙең көсөн туплап, төрлө йүнәлештәрҙә әү­ҙемерәк һәм системалыраҡ эш алып барырға кәрәк, – тип йом­ғаҡ яһаны Урал Килсенбаев.

Г. ВАРИСОВА.