Уңған ханым матур кәрзиндәр үрә

Балтас районының Көндәшле ауылында йәшәгән ҡул эштәре оҫтаһы Эльмира Сәхипова үҙенсәлекле шөғөлдө үҙ иткән. Ауыл мәҙәниәт йортоноң мәҙәни сараларҙы ойоштороусыһы эшен башҡа кешегә ҡалдырғас, Эльмира Михайловна полиротанг тигән яһалма материалдан ҡулдан бик матур кәрзиндәр үрә башлаған.

– Материалды интернет-магазин­дарҙан һатып алырға була. Миңә ситтә йәшәгән ҡыҙым алып ҡайтты. Хәҙер интернет бар. Теләгән кешегә ниндәй генә һөнәр үҙләштереү мөмкинлеге юҡ! Көн дауамында өс–дүрт сәғәттә бер кәрзин үрергә була, – ти ҡул эштәре оҫтаһы.

Кәрзин үреүҙең үҙенсәлеге бар икән. Айырым өлөштәрен туҡта­май эшләргә кәрәк. Юҡһа сифатлы килеп сыҡмай. Онотолоп, бирелеп үргән кәрзиндәр тигеҙ, матур, уңайлы, күңелгә ятышлы килеп сыға, ти оҫта ханым.

Эльмира Сәхипова белдере­үенсә, кәрзинде үҙең теләгән формала үрергә була. Унан да бигерәк, буяу һауыт­тарына, төрлө биҙрә, тас һәм ҡулла­ныуҙа булған, шаҡтай таушалған башҡа һауыт­тарға икенсе “ғүмер” биреп, яңынан ҡулланырға мөмкин.

Эльмира Михайловна кәрзин­дәрҙе үҙе, яҡындары, туғандары өсөн эшләй. Бүләк өсөн ҡулла­нырға ла бик ҡулай, ти. Пластмасса һауыттарҙы ҡояш нурҙа­рынан һаҡлай, уларҙы йортта үҫтергән гөлдәр өсөн дә ҡулланырға була. Аҫылмалы гөлдәр ултыртылған үҙенсәлекле кәрзиндәр йортҡа күркәм биҙәк булып ултырасаҡ.

Аида ХӘЙРЕТДИНОВА.

Балтас районы.