Республикабыҙҙың ҙур спорт потенциалы һәм ғорурланырлыҡ ҡаҙаныштары бар

“Бөгөн Халыҡ-ара спорт көнө билдәләнә. Борон-борондан спорт кешеләрҙе берләштергән, тыныслыҡ символы булған, Боронғо Грецияла Олимпия уйындары көндәрендә һуғыштар туҡтап торған.

Ҡайһы берәүҙәр спорт менән шөғөлләнеү өсөн йәшәй, икенселәр йәшәр өсөн спорт менән шөғөлләнә: оҙағыраҡ, сәләмәтерәк ғүмер кисереү, уның ярҙамында ауырыуҙарҙы еңеү, рухты нығытыу өсөн. Байрамдың маҡсаты – минеңсә, һәр кемгә физик яҡтан әүҙем булыуҙың ни тиклем мөһим булыуын еткереү. Бөгөн һәр әҙерлек кимәле өсөн спорт менән шөғөлләнеүҙең күп варианттары бар.

Башҡортостан был өлкәне үҫтереүгә 10 миллиард һум самаһы аҡса бүлә, беҙ республикала 141 спорт төрөнә ярҙам итәбеҙ. Хөкүмәт бер нисә йүнәлештә эшләй:

1. Күмәк спортты үҫтереү. Мин быны төп бурыс тип иҫәпләйем. Бөгөн республикала 2,3 миллиондан ашыу кеше физкультура менән шөғөлләнә. «Ауыл тренеры» һәм «Ҡала тренеры» проекттары булдырылған, мәҫәлән, быйыл ғына уларҙа 30 кеше ҡатнашҡан.
2. Спорт объекттарын төҙөү. Был күрһәткес буйынса беҙ илдә лидерҙарҙың береһе. Былтыр өс ҙур объект – Фехтование үҙәге (унда бер үк ваҡытта 28 фехтование юлын файҙаланырға мөмкин), Ишкәкле слалом өсөн ҡоролмалар комплексы (Рәсәйҙә миҙгелгә ҡарамай ярыштар үткәрергә мөмкинлек биргән берҙән-бер комплекс) һәм архитектура йәһәтенән мөһабәт Көрәш һарайы (Рәсәйҙә генә түгел, Евразияла ла иң эреләрҙең береһе).

Быйыл тағы ла биш спорт объектын файҙаланыуға тапшырырға планлаштырабыҙ. Еңел атлетика манежын һәм Олимпия резервы училищеһын, шулай уҡ Бокс прогресы үҙәген һәм Теннис академияһын проектлайбыҙ. Киләһе йылда уларҙы төҙөй башлаясаҡбыҙ.

3. Юғары ҡаҙаныштар спорты. Рәсәй йыйылма командалары составына 3,5 меңдән ашыу миҙал яулаған 429 Башҡортостан спортсыһы инә. Юғары спорт һөҙөмтәләренә өлгәшкән өсөн беҙ 552 спортсыны һәм уларҙың тренерҙарын матди яҡтан дәртләндерҙек, 207 йәш атлет махсус стипендиялар ала. Бер нисә командабыҙ Рәсәй ярыштарында республика исеменән лайыҡлы сығыш яһай: Өфөнөң «Салауат Юлаев» командаһы әле Гагарин Кубогы өсөн көрәште дауам итә, Рәсәй чемпионаты финалында «Ағиҙел» ҡатын-ҡыҙҙар хоккей командаһы уйнай, «Динамо-Урал» волейбол клубы уңышлы миҙгел үткәрҙе.

Республикабыҙҙың ҙур спорт потенциалы һәм ғорурланырлыҡ ҡаҙаныштары барлығын уҙған көҙ Өфөлә үткән «Рәсәй – спорт державаһы» халыҡ-ара форумы күрһәтте. Форумға Владимир Владимирович Путин килде. Уның килеүе Башҡортостандың Рәсәйҙең спорт картаһында мөһим урындарҙың береһен биләүен күрһәтте.

Әммә, билдәле булыуынса, спортта һәр ваҡыт һөҙөмтәләрҙе яҡшыртыуға ынтылырға кәрәк, һәм беҙ быны эшләйәсәкбеҙ!

Яңы еңеүҙәргә, дуҫтар!” – тип яҙҙы Андрей Назаров.

Сығанаҡ: vk.com/wall555400080_14806