Мәҙәниәт уты һүнеп барғанда...

Ауыл иһә районда иң ҙурҙарҙан һанала: бында 1415 кеше йәшәй. Халыҡ күптән мәҙәниәт йорто өсөн яңы бина һорай.

“Үҙебеҙҙең театр түңәрәгебеҙ бар, балалар бейеү һәм вокал менән шөғөлләнә. Был эш артабан да дауам итер ине, ҡыҙғанысҡа ҡаршы, мәҙәниәт йортонда шарттар юҡ”, – ти ауыл халҡы.

Район хакимиәте башлығы әйтеүенсә, муниципалитет ҡаҙнаһы һәм бюджеттан тыш сығанаҡтар иҫәбенә яңы төҙөлөштөң проект-смета документацияһы эшләнгән. Дәүләт экспертизаһының ыңғай һығымтаһы бар. Төҙөлөш-монтаж эштәренең дөйөм хаҡы – 40 миллион һум.

Хөкүмәттең ҡарары менән Түбәнге Ҡыйғыла мәҙәниәт йорто төҙөү 2019-2020 йылдарға Республика адреслы инвестиция программаһына индерелгән. Әле подрядсы ойошманы билдәләү буйынса конкурс процедуралары бара. Төҙөүселәр яңы бинаны быйыл ноябрҙә тапшырырға планлаштыра.