Башҡортостанға рәхим ит, Туҡай!

Сара әҙиптең Башҡортостанда йәшәгән милләттәштәре генә түгел, республиканың барлыҡ кешеләре өсөн дә бик мөһим ине. Мәшһүр Туҡайҙы беҙҙә лә бәләкәйҙән уҡып үҫәләр, беләләр.

Башҡортостанда Татарстан Республикаһы көндәре сиктәрендәге һәйкәл асыу байрамы бик тантаналы шарттарҙа үтте. Унда Башҡортостан Башлығы вазифаһын ваҡытлыса башҡарыусы Радий Хәбиров, Татарстан Президенты Рөстәм Миңлеханов, башҡарма власть органдары, яҙыусылар һәм шағирҙар, йәмәғәт ойошмаһы вәкилдәре, ябай халыҡ ҡатнашты.

– Башҡортостанға рәхим ит, бөйөк Туҡай! Бөгөн был һәйкәлде асыу ике туғандаш республика өсөн бик мөһим. Ул – беҙҙең дуҫлыҡ символы. Был шатлыҡлы ваҡиғаны Татарстан халҡы ла беҙҙең менән бергә уртаҡлаша, – тине Радий Хәбиров. – Башҡортостанда Туҡайҙы бик яраталар һәм хөрмәт итәләр. Беҙҙең Республика йорто ла уның исемен йөрөткән урамда урынлашҡан бит.

Татарстан Президенты Рөстәм Миңлеханов тәү сиратта Башҡортостан халҡын 100 йыллыҡ юбилей менән ҡотланы.

– Матур көндә, бик матур урында асыла был һәйкәл. Беҙҙе, Туҡайыбыҙҙы ҙурлағанығыҙ, хөрмәт иткәнегеҙ өсөн ысын күңелдән халыҡҡа, етәкселеккә ҙур рәхмәт, – тине Рөстәм Миңлеханов. – Беҙ Башҡортостандың уңыштарын күреп-белеп торабыҙ, һеҙҙең менән бергә шатланабыҙ. Артабан да бергә, алға барайыҡ!

Башҡортостандың халыҡ шағиры, Салауат Юлаев исемендәге дәүләт премияһы лауреаты Хәсән Назар Ғабдулла Туҡайға арналған шиғырын уҡып ишеттерҙе. Яҡташыбыҙ – Татарстанда йәшәгән шағир һәм журналист Роберт Миңнуллин да сығыш яһаны.

Айрат Нурмөхәмәтов фотоһы