Бөтә яңылыҡтар
Әҙәбиәт һәм мәҙәниәт
23 Апрель 2019, 11:45

Көтөп алынған бүләк

Ҡырмыҫҡалы районы Ҡабаҡ ауыл биләмәһе хакимиәте башлығы Рус­лан Әйүпов көндән-көн күҙгә күренеп үҫкән төбәктең тынғыһыҙ көндәлек мәшәҡәттәре, халыҡтың йәшәйеше менән таныштыра-таныштыра беҙҙе мәҙәниәт усағына әйҙәне.

Ҡырмыҫҡалы районы Ҡабаҡ ауыл биләмәһе хакимиәте башлығы Рус­лан Әйүпов көндән-көн күҙгә күренеп үҫкән төбәктең тынғыһыҙ көндәлек мәшәҡәттәре, халыҡтың йәшәйеше менән таныштыра-таныштыра беҙҙе мәҙәниәт усағына әйҙәне.


– Ауыл халҡының яҙғы осорҙа эше ифрат күп инде ул, – ти Рус­лан Фаил улы. – Биләмәне тәр­типкә килтереү, өмәләр ойоштороу, ҡаты көнкүреш ҡалдыҡтары ре­формаһын халыҡҡа аңлатыу – барыһы ла мөһим. Әйткәндәй, ха­кимиәткә лә яңы бурыстар өҫтәл­де, бына бөгөндән һәр береһе ете мең һум тирәһе торған 80 кон­тейнер алырға кәрәк, юлдарҙы төҙөкләндерәһе, йыйындар үткә­рәһе…

Эш эш менән, ә кешегә ял итеү, кү­ңел асыу, аралашыу өсөн уңай­лы мөхит тә кәрәк. “Башҡортос­тандың 100 йыллығына – 100 объект” программаһына ярашлы, Ҡабаҡта 300 урынлыҡ өр-яңы клубтың эш башлауы һәммәбеҙ өсөн дә оло бүләк булды.


Бынан 22 йыл элек ябылған иҫке клуб урынына, ниһайәт, заманса уңайлыҡтар, иркен сәхнә, гример бүлмәләре, аппаратура, янғын хәүефһеҙлеге саралары булдырылған күркәм мәҙәниәт усағы ҡалҡып сыҡҡан. Ярты йыл самаһы ғына элек асылған клубта тормош гөр килеп тора: “Илһөйәр” фольклор төркөмө, “Фламинго” бал бейеүҙәре, “Ынйыҡай” халыҡ бейеү ансамблдәре, балалар сән­ғәт мәктәбенең филиалы эшләй. Фойеға килеп инеү менән йәш рәс­самдарҙың оҫта ҡулдары ижад иткән һүрәттәр күргәҙмәһе ҡаршы ала.


– Ҡабаҡтар – йыр-моң һөйөү­сән, ижади халыҡ. Шул ҡәҙәре ғүмер нисек клубһыҙ йәшәлгәндер, үҙебеҙ ҙә аптырайбыҙ. Һәләт­тәреңде күрһәтеү, ялыңды йөкмәт­келе, файҙалы үткәреү өсөн өр-яңы мөмкинлектәр асылды, – ти клубтың мәҙәниәт эштәрен ойоштороусы Хәлисә Әхмәтшина.


– Ошо ҡыҫҡа ғына ваҡыт эсен­дә әҙерләнгән “Өләсәйҙең асыҡ һандығы” тип аталған фольклор байрамы бик уңышлы, ма­уыҡтыр­ғыс үтте. Тамашасы­ла­ры­быҙ бо­ронғо биҙәү әйберҙәре, халыҡ ижады өлгөләре, туй йолалары менән ҡыҙыҡһынып танышты. Ғәлиәскәр Камалдың “Беренсе театр” әҫәрен сәхнә­ләш­тер­ҙек. Әле бына “Илһөйәр” фольк­лор ансамб­ле­нең реперту­арын байытыу өҫтөндә эшләйбеҙ. Өфө яҡын булғас, артистар йыш килеп, тамашалары менән ҡыуандырып тора.


“Ғаилә менән уҡыу” мәғлүмәт үҙәгенең клубта урынлашыуы ла ата-әсә өсөн уңайлы. Гәзит-журналдарҙан тыш, дүрт мең китап тәҡдим итә китапханасы Әлфиә Ҡаһирова. “Кешеләргә аң, ғилем, иман килтергән мөғжизәле китап донъяһында эшләүем менән бәхетлемен”, – ти ул. Фольклор ансамбленең иң әүҙем ағзала­рының береһе Миңзилә Әхтәмова үҙе лә хис-тойғоһон шиғыр юлдарына һалып, ижад итеүҙән ҡыуа­ныс, көс алып йәшәй.


Олоһон-кесеһен бер усҡа йый­ған Ҡабаҡ ауылы клубының уттары көндән-көн сағыуыраҡ балҡы­рына, йыр-моңға һыуһаған, осрашыу шатлыҡтарына сарсаған күңелдәрҙең яңырырына шик юҡ. Тарихи йылда ауылға ҡот булып ҡайтҡан мәҙәниәт усағының ғүмере оҙайлы, юлы ырамлы булһын.