Был спектакль “бомба” буласаҡ!

Ижад миҙгеле ябылыр алдынан театр премьера менән ҡыуандырмаҡсы: 26 июнь Салауат Әбүзәрҙең пьесаһы буйынса ҡуйылған “Бомба” спектакле тамашасы хөкөмөнә сыға.

Театрҙа тағы ла бер сағыу сара көтөлә – 21 июнь Башҡортостандың халыҡ артисы Азамат Ғафаров 45 йәшлек юбилейы уңайынан барыһын да ижад кисәһенә саҡыра.

Матбуғат конференцияһында театрҙың художество етәксеһе вазифаһын башҡарыусы Иршат Фәйзуллин, “Бомба” комедияһының режиссеры, актер Фирғәт Ғарипов ҡатнашты, журналистарҙы ҡыҙыҡһындырған һорауҙарға яуап бирҙе.

Иршат Ишбулат улы “Туғанлыҡ” халыҡ-ара төрки театрҙар фестивале сараларын әүҙем яҡтыртҡан һәм 99-сы ижад миҙгелендә театр менән тығыҙ хеҙмәттәшлек иткән хәбәрселәргә рәхмәт хаттары тапшырҙы. Был исемлектә “Башҡортостан” гәзитенән әҙәбиәт һәм мәҙәниәт бүлеге мөдире Лариса Абдуллина һәм ошо уҡ бүлек хәбәрсеһе Айгөл Йәмилева ла бар.