Бөтә яңылыҡтар

Яңы исемдәр менән таң ҡалдыра "Ҡош юлы"!

Быйыл гран-при яулаған шағирә Айһылыу Дауытова шәхсән күңелгә үтеп ингәйне. Уның яҙғандары нимәһе менәндер Рәмзилә Хисаметдинованың ижадын хәтерләтә.

“Ҡош юлы-2019" башҡорт бард фестиваленә ярашлы ойошторолған Шиғриәт бәйгеһе һәр йыл һайын яңы исемдәр менән таң ҡалдыра.
Быйыл гран-при яулаған шағирә Айһылыу Дауытова шәхсән күңелгә үтеп ингәйне. Уның яҙғандары нимәһе менәндер Рәмзилә Хисаметдинованың ижадын хәтерләтә.
Шундай матур шиғырҙар, табыш булған дүртъюллыҡтар килгән конкурсҡа! Йәштәр, һеҙ – башҡорт шиғриәтен тағы ла юғарыраҡ күтәрер ижадсылар!
Гран-при яулаған Айһылыу Дауытованың бер шиғырын тәҡдим итәм.

Мәтрүшкәләр



Әсәй менән мәтрүшкәләр йыйҙыҡ,

Бар донъяны алды хуш еҫе.

Йырлай-йырлай йыйған шул мәтрүшкә –

Йәмле йәйҙең сағыу бер төҫө.


Көлә-көлә йүгерә бала сағым,

Ә ҡулында – алһыу мәтрүшкә,

Шуға күрә, ахыры, йыйғанда ла

Мәтрүшкәләр, гүйә, көлөшә.


Уҙып бара, эйе, бала сағым,

Уңып бара йәйҙең сағыуы.

Мөғжизә бит: әсәй ҡулындағы

Мәтрүшкәнең көләс ҡалыуы.