Радик Юлъяҡшиндың ғәйебе нимәлә?

"Бик ауыр ваҡыттарҙа Илһам ағай миңә кәңәш бирә ине. "Эй Хәмдүш, насар һөйләһәләр ҙә, яҡшы тиһәләр ҙә - һөйөн, сөнки булған кешене генә һөйләйҙәр. Һөйләмәйҙәр икән, кәрәгең шул тиклем генә", – тигәне иҫтә.

Хәҙер бына Радик Юлъяҡшин тураһында нимә генә һөйләмәйҙәр. Булдыра сөнки! Беҙҙең йәштәргә ошо йырсы етмәгән булған, сөнки заман үҙгәрә, уның менән бергә ҡибла ла. Ә ул башта дискотекаһын үткәрә, унан концертын. Халыҡ артынан йөрөй, ә ул ябайлығын юғалтмай. Бик тәрбиәле егет, еңел-елпе малай түгел. Атайһыҙ үҫкән кеше ул, мин үҙен бәләкәйҙән беләм. 13 йәшендә Өфөлә киске дискотекаларҙа йырлап йөрөнө. Радиктың бөтә ғәйебе – йәштәрҙең уға тартылыуы. Тауышһыҙ, тинеләр. Тауышһыҙ кеше ун бишәр мең халыҡты йыя аламы? Мин уны беҙҙең Майкл Джексон тим. Теләйбеҙме беҙ, юҡмы, тормоштоң законы шундай: бөтә кешегә лә ярап бөтөп булмай”, - тип һөйләгән яратҡан йырсыбыҙ Хәмдүнә Тимерғәлиева.