Идеяларҙан – ғәмәлдәргә

Был фестиваль – ул һөнәрҙәрҙең мәғариф майҙансығы булды, тиһәк, моғайын, дөрөҫ булыр. Унда ҡатна­шыусылар Башҡортостандың, йәғни Көньяҡ Уралдың иҡтисады тармаҡта­рында көнүҙәк булған һөнәрҙәр менән танышты. Акцияла төрлө һөнәрҙәр буйынса интерактив зоналар эшләне. Был сараның төп маҡсаты – эшсе һөнәрҙәрҙе пропагандалау, уларҙың бәҫен арттырыу, мәктәп уҡыусы­ларында, студенттарҙа, ата-әсәләрҙә һөнәр һайлауға ярҙам итеү, заманса фекерләргә өйрәтеү.

Акция сиктәрендә ”Белем алыусы­ларҙың һөнәр һайлауҙа үҙбилдә­ләнеш моделен булдырыу: иртә һөнәри йүнәлеш биреүҙән хеҙмәт баҙарындағы адаптацияға” тигән темаға “түңәрәк өҫтәл” ойошторолдо. Сарала ғаилә, хеҙмәт һәм халыҡты социаль яҡлау министры урынбаҫары Ф. Шәйхисламова, төрлө предприятие етәкселәре, уҡыу йорттары вәкилдәре ҡатнашты. Һаулыҡ мөмкинлектәре сикләнгән балалар һәм уларҙың ата-әсәһе өсөн мини-лекциялар, социаль педагогтар, һөнәри йүнәлеш биреү, һөнәри ҡыҙыҡһыныу һәм ынтылыштар диагностикаһы буйынса белгес­тәр өсөн оҫталыҡ дәрестәре, диагностика һөҙөмтәләре буйынса шәхси консультациялар ойошторолдо.

Сибай институты фестивалдә ҡат­нашыусыларға ҙур программа тәҡдим итте: вуздың эшмәкәрлеге, уҡытыу системаһы, йәшәйеше тураһында видеоролик күрһәтелде, белгестәр әҙерләү йүнәлеше буйынса махсус буклеттар һәм ҡулланма материалдар таратылды. Институттың төрлө йүнәлештә белем биреүен, студенттарын күп төрлө һөнәр эйәләре итеп сығарыуын иҫәпкә алғанда, был осрашыуҙан бик күптәр үҙенә фәһем һәм файҙалы мәғлүмәт алды.