“Ҡаурый ҡәләм” ижадҡа ҡанат ҡуя

…Юлға сығыр алдынан күңе­лемдән Кушнаренко еренән сыҡҡан яҙыусы­ларҙы барланым. Иң башта шағирә, актриса Рәғиҙә Янбулатова күҙ алдыма балҡып килеп баҫты, уның һүҙҙәренә яҙылған йырҙы ла һуҙып алдым: “…Хәтерлә һин ошо минуттарҙы, хәтерлә һин…” Әсә­йемдең яратҡан йыры. “Тау башында балҡый бер ҡала, ул ҡала Өфө тип атала…” – йәнә ошо йыры ла беҙҙең быуынды баш ҡалаға саҡырып торманымы ни!

Ошо төбәктән оло ижад юлына Рә­диф Ғаташ, Хәсән Мөхтәр, Карам Бакиров, Нәжибә Әминева һәм башҡалар сыҡҡан – йәмғеһе 22 әҙип. Был – бик ҙур күрһәткес һәм ҡәләм тибрәтеү­се­ләрҙең йәш быуынын үҫтереү, ҡанат ҡуйыу, тра­дицияларҙы дауам итеү – изге эш. Әлбиттә, бындай яуаплы, киң даирәле эште район етәкселеге, мә­ғариф, мәҙәниәт хеҙмәт­кәрҙәре, йәмә­ғәт­селек күтәреп алмаһа, баш­ҡарыуы ауыр булыр ине. Күреүем­сә, “Ҡаурый ҡәләм”гә иғтибар ҙур. Байрамдың район мәҙәниәт йортонда уҙғарылыуы үҙе үк ошо хаҡта әйтеп тора.

Биш йыл – үҙенә күрә йом­ғаҡ­лау, алда торған бурыстарҙы барлау осоро. Ә бурыстар, район ха­ки­миәтенең мә­ҙә­ниәт бүлеге начальнигы Флидә Мө­хә­мәтйәнова үҙенең сығышында әйт­кән­сә, юға­ры: балаларҙа туған телгә, әҙә­би­әткә һөйөү тәрбиәләү, кешелек тарихында тупланған бөйөк рухи-мә­ҙәни ҡиммәттәрҙе өйрәнеүгә, һаҡ­лауға йүнәлеш биреү. Һәм, әлбиттә, кү­ңел ҡыл­дарын сирткән күре­неш­тәрҙе ши­ғыр­ға һалырға ынтылған йәш ижадсы­ларға һәр төрлө ярҙам күрһәтеү, беренсе нәү­бәттә һөнәр серҙәрен асыу, оҫта­лыҡ дәрестәре биреү. Был йәһәттә Фәндидә Туҡ­тарғәле ҡыҙы дәртләнеп эшләй, тиҫтәләрсә автор­ҙың яҙған­дарын уҡый, кәңәштәр бирә, тел һәм әҙәбиәт уҡытыусылары менән бәйләнеш тота.

Өс тиҫтәнән күберәк бала “Баш­ҡортостан – тыуған йортом”, “Әсәм теле гөлдәрҙәй тере”, “Янмаһын һуғыш уты”, “Үҙенсә матур йылдың һәр миҙ­геле”, “Тыуған ауылым, бергенәм” һәм башҡа номинация­ларҙа бүләк­ләнде (байрамдың бағыусыһы – Ҡалтай крәҫтиән (фермер) хужалығы етәксеһе Дамир Ғилманов).

Фәндидә Харрасованың шәхси премияларына Иҫке Ҡормаш мәк­тәбенән Наҙгөл Хәйретдинова, Кушнаренконың 1-се мәктәбенән Камила Иҙрисова, Әхмәт урта мәктәбенән Дарья Тяптина, Арина Ғилмийәровалар лайыҡ булды.

Айырым билдәләп үтергә кәрәк: бәйгелә ҡатнашыусылар өс телдә – башҡорт, татар һәм рус телдәрендә ижад итә. Номинанттар һәм лауреаттар сәхнәлә шиғырҙарын туған телдәрендә яңғыратты.

Бүләкләүҙәр, сығыштар концерт номерҙары менән аралашып бар­ҙы. Республикала үткәрелгән ха­лыҡ-ара һәм башҡа бик күп конкурстар лауреаты, нәфис һүҙ оҫтаһы Нәзирә Сәхә­пованың Рафаэль Сафиндың халыҡ хәтерендә юйылмаҫ “Ҡыр ҡаҙҙары” шиғырын уҡыуы һоҡландырҙы. Сәхнәлә йырҙар, ҡурай моңо тирбәлде.

Беҙ, Өфө ҡунаҡтары, Башҡорт­остан Яҙыусылар союзы идараһы рәйесе урынбаҫары, шағир Нурлан Ғәниев, тележурналист, шағирә Хәлисә Мөхәмәҙиева һәм мин, был күркәм байрамда ҙур шатлыҡ ки­серҙек. Халыҡ алдында сығыш яһа­ныҡ, балаларға китаптарыбыҙҙы бүләк иттек.