Артур Кәбиров яңғыҙ юлға сыға...

Шәйехзада Бабич исемендәге дәүләт премияһы лауреаты, Мәжит Ғафури исемендәге Башҡорт дәүләт академия драма театры актеры Артур Кәбировты күптәр моңло тауышлы йырсы булараҡ та белә. Ул - “Ҡош юлы” республика башҡорт бард фестивале еңеүсеһе лә.

Артур репертуарындағы күпселек йырҙарҙы үҙе яҙа. Шиғри күңелле актер-йырсы бынан дүрт йыл элек уның ижадын ихлас үҙ иткән тамашасыһына “Ут биреп торған сағым” исемле концертын тәҡдим итһә, 31 ғинуарҙа ул тағы ла бер концерты менән ҡыуандырасаҡ.

“Яңғыҙ юлсы” тип аталған кисәлә тормошта төп урынды алып торған мәңгелек ҡиммәттәр хаҡында һүҙ барыр, фәлсәфәүи фекер йөрөтөлөр, Артур сараға килгән кешеләргә күңел йылыһын өләшер тип күҙаллайыҡ, сөнки концерттың тулы эстәлеге әле сер булып ҡала.

Фото Артур Кәбировтың шәхси архивынан.