Кейеҙ мөғжизәләре

Ләйсән Ирек ҡыҙы – биҙәү-ҡулланма сәнғәте өлкәһендә эшләгән оҫта. Ул – кейеҙҙе художестволы эшкәртеү һәм туҡыу техникаһы төрҙәре (ҡо­рама ҡорау, туҡыма интар­сияһы, биҙәкләп эшләнгән һү­рәтле келәм, Индонезия һәм Һиндостан халыҡтары ҡул­ланған боронғо биҙәк техни­каһы батик) менән оҫта эш иткән, Рәсәй Рәссамдар союзы һәм Башҡортостан һөнәр­селәр берлеге ағзаһы, халыҡ-ара, төбәк-ара, республика һынлы сәнғәт бәйгеләрендә ҡатнаш­ҡан рәссам.

Ләйсән Ирек ҡыҙының панноларына төрлө геометрик формаларҙағы, яҫылыҡтағы күләмле рельеф һүрәттәр хас. Уның эштәренең төп мотивтарын төрки халыҡтарына ғына хас мифик һәм поэтик контекстар, символдар һәм тамғалар, милли биҙәктәр тәшкил итә.

М. Аҡмулла исемендәге Баш­ҡорт дәүләт педагогия уни­верситетының һынлы сән­ғәт, графика факультетын тамамлап, хәҙер инде Өфө ҡала­һының 2-се Балалар художество мәктәбенең рәсем, һынлы сәнғәт, композиция һәм биҙәү-ҡулланма сәнғәте уҡытыу­сыһы булып эшләгән Ләйсән Ғилманова үҙе лә, уның уҡыу­сы­лары ла кейеҙҙән төрлө әй­бер­ҙәр һәм паннолар яһай. Етәк­селәре менән балалар ке­йеҙ сәнғәтенең тарихы һәм сәнғәт төрө булараҡ ошо шө­ғөл­дөң хәҙерге үҫеше менән таныша.

“Кейеҙ мөғжизәләре” тип исемләнгән күргәҙмәлә уҡыу­сы­ларҙың айырым да, күмәк­ләп тә башҡарған ижад эштәре урын алды. Күргәҙмәләге паннолар, кейеҙҙән баҫылған ҡур­саҡтар, уйынсыҡтар, арт-объекттар, баш кейемдәре һәм сум­калар төрлө бәйгеләрҙә, фестивалдәрҙә ҡатнашҡан. Уларҙа һәр баланың үҙ стиле, донъяны ҡабул итеүе, һәләте һәм тормошҡа ҡарашы асыҡ сағылған.

Күргәҙмә асылған көндә Ләйсән Ирек ҡыҙы кейеҙ тех­ни­каһы буйынса оҫталыҡ дә­ресе бирҙе. Бер ай эшләгән үҙен­сәлекле күргәҙмә бөгөн, 31 ғинуарҙа, ябыла. Кемдәр уны әле күрмәгән, рәхим итегеҙ!