+13 °С
Облачно
Әҙәбиәт һәм мәҙәниәт
17 Апреля 2020, 13:55
Ауыр бала саҡтың хәтирәһе күңелемдә ҡабат яңыра…
Һуғыш осоро малайҙары
Ҡыйғыларҙан Сулеяға –
Ҡырҡ биш саҡрым ара.
Үҫмер саҡта үткән юлдар
Хәтерҙә һаман яна.
Төньяҡ-көнсығыш төбәккә
Сулея баш ҡала ине.
Беҙҙең өсөн тимер юл да
Шунан башлана ине.
Күп эшләргә, тауарға ла
Йөрөлдө ошо яҡҡа
Ниҙәр генә күрмәнек һуң
Ҡышын барғанда атта.
Һуғыш осоро малайҙарын
Сыныҡтырҙы бит яҙмыш.
Иртә керҙек ҡул-араға,
Яҡшырһын тиеп тормош.
“Йылы шишмә”, “Әйле”, “Пристань”
Ҡалды юлда оҙатып.
Кирбес, цемент, күмер тейәп,
Күпме уҙҙыҡ саң йотоп.
Тәүге тапҡыр поезды ла
Сулеяла күрҙем мин.
Поезға ултырып китергә
Хыялланып йөрөнөм мин.
Хыялдар тормошҡа ашты,
Киттем йыраҡ ҡалаға.
Мендем белем тауҙарына,
Йылдар ятты араға.
Ҡаҙаҡ илен, Байконурҙы,
Ташкентты ҡайттым урап.
Мәскәү яҡтарында булдым,
Үҫмер саҡ ҡалды йыраҡ!
Намыҫ менән үттем юлды,
Ауыр йөк булды иңдә.
Бар көсөмдө, ҡөҙрәтемде
Бирҙем мин тыуған илгә!
…Йылдар үткән, килдем тағы
Сулея яҡтарына,
Үҫмер саҡты эҙләп йөрөйөм
Тимер юл саттарында!!!
Ниҙәр көтә беҙҙе иртәгә?
Нисә көндәр, нисә төндәр инде
Ҡарҙар ҡатыш яуа ямғырҙар,
Ауыр бала саҡтың хәтирәһе
Күңелемдә ҡабат яңыра.
Ҡар-буранда, дауыл-ямғырҙарҙа
Беҙҙең быуын байтаҡ сыланды,
Татыһа ла заман михнәттәрен,
Киләсәген уйлап йыуанды.
Сыныҡһындар типме әллә яҙмыш
Ямғыр-бурандарҙа ҡалдырҙы,
Яман һуғыш күпме ғүмерҙәрҙе,
Бала саҡты беҙҙең яндырҙы.
Ир-ат – яуҙа, бөтөн ауырлыҡтар
Төштө әсәйҙәрҙең өҫтөнә,
Икмәк тә юҡ, картуфына ҡытлыҡ,
Йән һаҡланы ниндәй көс кенә?
Был тормоштоң ямғыр-бурандары
Гел оҙатып йөрөнө юлдарҙа,
Ярай әле өмөт-тырышлыҡтар
Алып сыҡты яҡты йылдарға.
Яҡтылыҡҡа, яҡшылыҡҡа мохтаж
Гөлдәр инек, гүйә, был ерҙә,
Ғүмер уйы яҙмыш беҙҙән шулай
Һынау ала һаман ул ниңә?
Аҫты-өҫкә килде донъяларҙың,
Бөгөн тағы йәнем үртәлә.
Яуап бирсе, яңы тыуған быуат,
Ниҙәр көтә беҙҙе иртәгә?
…Нисә көндәр, нисә төндәр инде
Ҡарҙар ҡатыш яуа ямғырҙар,
Ауыр бала саҡтың хәтирәһе
Күңелемдә ҡабат яңыра…
Туҡай һәйкәле янында
Туҡайға һәйкәл ҡуйылды
Өфөнөң уртаһында,
Тағы бер йондоҙ ҡабынды
Баш ҡала картаһында.
Бөйөк Туҡай уйға сумып
Күҙәтә тирә-яҡты,
Кешеләргә бәхет юрай,
Ҡарашы үткер, яҡты.
Шағирҙың ярһыу йырҙары
Илде, телде яҡлайҙар,
Һәр милләткә һәм Ватанға
Оло һөйөү һаҡлайҙар.
Туҡай йыры, Туҡай моңо –
Халыҡтарҙың байлығы,
Һәр кемгә юлдар күрһәтә,
Арта йәшәү шатлығы,
Рухы ныҡлы булған уның
Күңеле саф, ирекле,
Бар донъя һыйған йәненә,
Гиҙгән йыһан киңлеген.
Халыҡтарҙың ғорурлығы,
Намыҫы ул, выжданы,
Мәңге балҡы, бөйөк Туҡай,
Төркиҙең һүнмәҫ даны!
Туҡай йыры, Туҡай моңо
Тулған яҡты нурҙарға,
Саҡыра ул беҙҙе бөгөн дә
Тура, изге юлдарға.
…Ул беҙгә терәк, таяныс
Ауыр, ҡырыҫ заманда,
– Телде, моңдо һаҡлағыҙ, – тип
Иҫкәртә гел һаман да!
Туҡай йыры – мәңгелек ул,
Ҡояштыр Ил күгендә,
Халыҡтарға байраҡ та ул,
Хаҡлыҡ даулай бөгөн дә
Хаҡлыҡ даулай бөгөн дә!!!
Бөйөк Еңеү көнө бөгөн
Урамдарҙан, майҙандарҙан үтә,
Ветерандар, йәштәр теҙелеп,
“Үлемһеҙ полк” мәңге булһын тере,
Моң ағыла йәнде өҙҙөрөп!
Юҡ, батырҙар үлмәй, йәшәй улар
Беҙҙең хәтерҙәрҙә гел генә,
Рәсемдәре атлай беҙҙең менән,
Хәтирәләр арта күңелдә.
Ветерандар оҙаҡ йәшәһендәр,
Был тормоштоң нурлап юлдарын,
Онотмайыҡ, дуҫтар, онотмайыҡ,
Ғәрәсәтле һуғыш йылдарын!
Һыҙлаһа ла, әрнеһә лә йөрәк,
“Үлемһеҙҙәр” бара бер сафта,
Оло рәхмәт һеҙгә, ветерандар,
Рәсемдәр бит балҡый һәр саҡта!
…Бөгөн байрам, ләкин йөҙҙәр моңһоу,
Еңеү тантанаһы илемдә,
Күп ҡорбандар аша килгән Еңеү,
Онотолмаһын ине мәңгегә!
Онотолмаһын ине мәңгегә!
Бергәләп атлайыҡ
Тамсы һыуҙың ҡәҙерен беләм,
Сүл-далала һыуһаным,
Ҡаҙаҡ иле – Байконурҙа
Ятып ҡалды дуҫтарым.
Дуҫтарҙың мин ҡәҙ(е)рен беләм,
Улар таяныс, терәк.
Ҡыйын саҡта ла дуҫлыҡҡа,
Тоғро ҡалырға кәрәк!
…Йәшәүҙең дә ҡәҙере арта
Һаулығың ҡаҡшағанда,
Тормош барыбер еңелерәк,
Бергәләп атлағанда!
Бергәләп атлағанда!
Һағыныу хисе
Таш ҡалала йәшәйбеҙ бит,
Күңелдәр ҙә ҡатҡандыр,
Тыуған ерҙән киткәнбеҙ шул,
Йәнгә юшҡын ятҡандыр?!
Ҡала шау-шыуы йонсота,
Ҡайтабыҙ эштән арып,
Таш юлдарҙың ҡатылығы,
Көс-хәлде ҡала алып.
Таш йорттарҙың һауаһынан
Никтер йөрәк ҡыҫыла.
Күптәр уфтанып йәшәйҙәр,
Күҙҙәргә йәштәр тула.
…Ризыҡ йөрөтәлер кешене,
Яҙмыштан уҙмыш юҡтыр,
Тыуған яҡты һағыныу хисе
Мәңгелек һағыш-уттыр!!!
Мәңгелек һағыш-уттыр!!!
