+21 °С
Болотло
Әҙәбиәт һәм мәҙәниәт
22 Май 2020, 12:35
Беҙ еңербеҙ – йәшәр кешелек!
Төш тиһәң, төш түгел, өн дә түгел,Күҙ алдында ғәжәп ғәләмәт:Ниндәй күренеш был? АрағыҙҙаБелеүселәр бармы, йәмәғәт?
1
Кем һин, мәкерле дошман?
Төш тиһәң, төш түгел, өн дә түгел,
Күҙ алдында ғәжәп ғәләмәт:
Ниндәй күренеш был? Арағыҙҙа
Белеүселәр бармы, йәмәғәт?
Көтмәгәндә зәхмәт баҫып алды
Кешеләрҙе, илде, Ер шарын.
Түңкәрелде донъя. Тормош ҡайнай,
Ташлап сығып аҡыл ярҙарын.
Күҙгә күренмәгән яуыз дошман
Кешелеккә төбәп ут асты.
Ерҙә аңлы йәшәйеште өтөү –
Мәкерлеге уның шул саҡлы.
Халыҡ шаңҡып ҡалды, аңламайса
Баҫҡынсының һуғыш шарттарын;
Беҙҙең өсөн ниндәй ҡорал һайлап,
Билдәләүен ғүмер хаҡтарын.
2
Зиһен етмәҫ хәлдәр
Дошман яуыз булһа, беҙ – кешеләр,
Уның һымаҡ башһыҙ түгелбеҙ,
Өр-яңы бер көрәш юлы таптыҡ,
Шарт ҡуябыҙ хәҙер үҙебеҙ.
Атакаға тик ул ғына бара,
Беҙ йөрөмәйбеҙ улай этләнеп.
Иң төп көрәшебеҙ – өйҙә ятыу,
Алышабыҙ өйҙә бикләнеп.
Эшкә барыу, хеҙмәт һалыу – өйҙә,
Ашау, эсеү өйҙә – барынса.
Заманына күрә заңы инде:
Һуғышабыҙ шулай – яңыса.
Уҡыу, эшләү, дауаланыу – өйҙә,
Өйҙәргә лә бирһен сабырлыҡ.
Бер ҡараһаң, илап-көлөшөрлөк,
Бер уйлаһаң, һуштан яҙырлыҡ.
Хәтәр заман тимәй, ғашиҡ йәндәр
Осрашырға юлын табалар.
Закон ҡаты: өс-дүрт метрҙан да
Яҡын булмаһын, ти, аралар.
Мәктәп, музей, клуб, стадиондар
Тәүлек буйы хәҙер йоҙаҡта.
Эй, Хоҙайым, был баш етмәҫ хәлдәр
Һуҙылмаһын ине оҙаҡҡа.
3
Баштүбән тамаша
Тағы яңы Указ сыҡты,
Мөһимдер сәбәптәре.
Әллә нимәләр уйлата
“Комендант сәғәттәре”.
Уйлатһа ла, аңлайбыҙ бит –
Был үҙенсә ҡурсалау.
Өлкәндәр ҙә, балалар ҙа
Булһындар, тип иҫән-һау.
Ят күренеш: битлеклеләр
Магазинда, банкта.
Элек шаҡ ҡатырҙар ине
Бындай сәйер халыҡҡа.
Битлек нимә, һәр кеменең –
Бирсәткә ҡулдарында.
Полиция ла туҡтатмай,
Осратһа юлдарында.
Битлек кейгән бандит түгел,
Һаҡлай кеше ғүмерен.
Хәҙер битлекһеҙҙәр – битһеҙ,
Белмәй ниҙәр күререн.
4
Тиңһеҙ алыш бара
Тамашалар, мөһим кәңәшмәләр,
Тапшырыуҙар хәҙер – онлайн.
Һуғыш барышынан сводкалар
Зәңгәр экрандарҙа – көн һайын.
Ҡорбандар һәм яралылар күпме,
Әсир алынғандар нисә мең?
Планетабыҙ– яу яланы хәҙер
Нисә көндәр инде, нисә төн.
Хыял етмәҫ тиңһеҙ алыш бара:
Танктар юҡ, бомба шартламай.
Матросовтар, гранаталар тотоп,
Амбразураларға атламай.
Яңы яуҙа ҡораллылар түгел,
Дауалаусы – тәүге сафтарҙа.
Тура килә ҡайсаҡ үҙҙәрен дә
Күңел яраһынан һаҡларға.
Баш эйәбеҙ, ап-аҡ фәрештәләр,
Һеҙҙең фиҙакәрлек – ғорурлыҡ.
Һоҡландыра һөнәр алғандағы
Антығыҙға булған тоғролоҡ.
Кемдер иген игә, дәрес бирә,
Завод цехтарында ҡайнай эш...
Тажлы вирустарға ҡарап тормай,
Дауам итә тормош-йәшәйеш.
Мәрхәмәтле ҡыҙҙар, ир-егеттәр
Күпме халыҡ – алғы һыҙыҡта.
Бер дошман да ҡаршы тора алмаҫ
Ҡандан килгән беҙҙең ныҡлыҡҡа.
Ғәскәренә күрә – яу башлығы,
Башлығыбыҙ – шөкөр итерлек.
Зәһәр көстәр менән алышҡанда,
Ҡорал булһын беҙҙең бөтөнлөк!
5
Иҫкәртеү
Гел ҡаранан ғына тормай донъя,
Хәбәрҙәр бар – йәнгә дауалар:
Вирус менән көрәш барышында
Таҙарына икән һауалар.
Һәм сафлана икән диңгеҙ, йылға,
Газдан, һөрөмдәрҙән арынып.
Ерҙе туҡландырыр ҡатламдар ҙа
Бөтмәй икән ҡатып, ярылып.
Рәхәтләнеп тындар ала икән
Ер үпкәһе булған урмандар.
Был сир – киҫәтеүе Бөйөк көстөң,
Был – иҫкәртеү беҙгә, туғандар!
6
Ҡотҡарайыҡ ғәзиз Ер йөҙөн!
Йыһан балаһы бит Еркәйебеҙ –
Еңеү көтә беҙҙән ғәләмдәр,
Тик ниәттәр яҡты булһа ғына,
Башҡарыла изге ғәмәлдәр.
Әлеге хәл – аҙған бәндәләрҙең
Хаталары өсөн хаҡтар ул.
Донъяға ҡот, мәрхәмәтлек ҡайтһа,
Аллабыҙ ҙа беҙҙе һаҡлар ул.
Балҡытайыҡ ихлас күңелдәрҙең
Кешелеклек тигән тойғоһон,
Иман, бәхет тигән төшөнсәләр
Кеше тигән һүҙгә тиң булһын!
Ҡалҡан итеп ҡуйып түҙемлекте,
Иңебеҙгә һалып яу йөгөн,
Үҙебеҙҙең йәшәүебеҙ менән
Ҡотҡарайыҡ ғәзиз Ер йөҙөн!
