+20 °С
Болотло
Әҙәбиәт һәм мәҙәниәт
18 Октябрь 2020, 15:00
Ауыл клубы яңы һулыш алды
Хәҙер ижади коллективтар яңы залдарҙа шөғөлләнә.
Күптән түгел Иглин районының Көҙәй ауылында күләмле ремонттан һуң мәҙәниәт йорто асылды. Ауылда өс меңгә яҡын кеше йәшәй. Мәҙәниәт йорто 1958 – 1959 йылдарҙа төҙөлгән. Әлегә тиклем унда төҙөкләндереү эштәре бер тапҡыр ҙа башҡарылмаған.
Клубта Рәсәй Президенты Владимир Путиндың май указы менән раҫланған “Мәҙәниәт” милли проектының “Мәҙәни мөхит” төбәк проекты буйынса грант аҡсаһына капиталь ремонт яһалды, матди-техник база яңыртылды. Грант күләме – 13 миллион һум. Был аҡсаға мәҙәниәт йорто ҡыйығы, канализация, электр, һыу һәм йылылыҡ селтәрҙәре, тәҙрәләр, төп сәхнәләге иҙән, шаршау алмаштырылған, стеналар буялған, түшәм яңыртылған. Тамашасылар залында өр-яңы 150 ултырғыс ҡуйылған.
Хәҙер ижади коллективтар яңы залдарҙа шөғөлләнә. Балалар өсөн уйын, ғәмәли ижад бүлмәләре, тренажер һәм бейеү залдары, китапхана тулыһынса төҙөкләндерелгән, йыһазландырылған. Китапханала ҙур булмаған музей асылған, ә мәҙәниәт йорто холында үҙешмәкәр рәссам Константин Федорович Трегубовтың күргәҙмәһе ойошторолған.
Фото: iglino.bashkortostan.ru
