Тәүге ҡоймаҡ төйөрлөмө?

Айлыбаныу-Баныу Ҡаһарма­но­ваны күптәр “Йәшлек” гәзите хәбәрсеһе, оҫта публицист һәм тән­ҡитсе булараҡ яҡшы белә. Шәһит Хоҙайбирҙин исемендәге премия лауреаты, Башҡортос­тан­дың атҡаҙанған матбуғат хеҙмәт­кәре үҙен драматургия өлкәһендә лә һынап ҡараны һәм өмөтлө йәш драматург итеп күрһәтә алды. Бә­хеткә күрә, әҫәренең оҫта режиссер ҡулына эләгеүен дә билдәләргә кәрәк, сөнки спектаклдең төп уңы­шы режиссерға бәйле икәнлеген күптәр яҡшы белә. Үҙе өсөн ятыраҡ булған өлкәгә, йәғни драматургияға тотоноуын Айлыбаныу Латиф ҡыҙы былай тип аңлата: “Осраҡлы ғына рәүештә интернет селтәрендә Башҡортостан драматургия һәм режиссура үҙәгенең семинар ойоштороуы хаҡында иғланды күреп, күрһәтелгән адресҡа пьеса ғәлә­мәтен яҙып һалғайным, улар мине саҡырҙы ла ҡуйҙы! Драматургия сер­ҙә­рен өйрәнеү тап шунан башланды. Режиссер Зиннур Сөләй­мәнов менән осрашыуҙы иң бә­хетле осраҡтарҙың береһе тип иҫәпләйем (2014 йылда ойошто­ролған үҙәктең директоры – Әлиә Яхина, Зиннур Фәрит улы – художество етәксеһе, проект авторы). Ул беҙҙе, йәш драматургтарҙы, ҡыҙыҡлы, мауыҡ­тырғыс яңы донъяға ихлас өйрәтте.

Уның етәкселегендә бер-бер артлы ике драма яҙып ташлағас, Зиннур Фәрит улы миңә иғтибарлап ҡараны: “Ҡарамаҡҡа рәп-рәхәт йәшәгән һымаҡһың, ауыҙың гел йырыҡ, йөҙөң ҡояштай балҡый, ҡайҙан һиндә шунсама драма-трагедия?!”

Етәксебеҙҙең “рәп-рәхәт” тигән һүҙе күңелдә ҡалды ла, уның “театрҙарға комедиялар етмәй, әйҙәгеҙ, комедия яҙығыҙ” тигәс, пьесамды тап шулай исемләргә ниәтләнем.

Күп тә үтмәй, “Рәхәт!” коме­дия­һын сибайҙарға уҡырға ебәрҙем. Көтөлмәгән хәл һуңыраҡ булды: Рәсәйҙең һәм Башҡортостандың атҡаҙанған мәҙәниәт хеҙмәткәре, Башҡортостандың атҡаҙанған сәнғәт эшмәкәре Дамир Мәжит улы Ғәлимов шылтыратып: “Пьесаңды алабыҙ”, – тигәс, бер аҙ шаңҡып ҡалдым. Ысынлап та, ышанманым, спектаклде килеп ҡарағанға тиклем “китсәле, булмаҫ” тип уйланым”.

Сибай театры – йәш драма­тургтарға оло тормошҡа юл асҡан тылсымлы йорттарҙың береһе лә, сөнки тап бында тәүге әҫәрҙәрен сәхнәләштереп, артабан мөғжи­зәле театр донъяһына юл ярып, бөгөн билдәле дараматург булып китеүселәр бихисап. Улар исем­легенә Таңсулпан Ғарипова, Рәлиф Кинйәбаев, Салауат Әбүзәр, Әминә Яхинаны индерергә мөмкин. Кем белә, бәлки, тәүге сирҡаныс алған Айлыбаныу Ҡаһарманованың килә­сәктә яңы әҫәрҙәре лә ҡуйылыр әле.

Тәүге ҡоймаҡ төйөрлө була ти­гәндәй, спектакль уныһынан да азат түгел, әммә әҫәр­ҙең бөгөнгә ауаздаш булыуы, ге­ройҙарының тормошо беҙҙең аранан алыныуы менән ҡыҙыҡ­лы һәм мажаралы. Һәр кемде персонаждарҙың арта­банғы яҙмышы нисек тамамланыр тигән уй борсой.

Ролдәрен бик оҫта башҡарған Башҡортостандың халыҡ артисы Рәмилә Хоҙайғолова, Башҡортос­тандың атҡаҙанған артисы Альберт Салауатов, артистар Морат Амантаев, Зәлиә Хафизова, Нәфисә Мәжитова һәм башҡаларҙың сы­ғышын ҙур кинәнес менән күҙәтте тамашасы.

Ни өсөн был донъяла йәшәүе рәхәт икәнлеген белгегеҙ килһә, Сибай театрына рәхим итегеҙ һәм йәш драматург Айлыбаныу Ҡа­һарманова әҫәре буйынса ҡуйыл­ған спектакль премьераһын мотлаҡ ҡарарға тырышығыҙ.

– Йөрәгем тулы һөйөү менән йөрөп ҡайттым Сибайҙан. Үҙем ҡурҡаҡ ҡына булһам да, был юлы уларҙы “ҡурҡытып” ҡайттым әле: “Тағы бер эшемде ебәрәм, көтөгөҙ! – тип йылмайҙы әңгәмәсем.

Тимәк, йәнә бер премьера ҡа­рарбыҙ, тигән ышаныста ҡалабыҙ.

Сибай ҡалаһы.