Остаздарын йылы һүҙҙәр менән телгә ала

Илнур Флүс улы тыумышы менән хозур тәбиғәтле Яңы Яндыҙ ауылынан, ошонда урта мәктәпте тамамлаған. Артабан белем эстәү ниәтендә Бөрө дәүләт педагогия институтының биология факультетына уҡырға ингән.

– Ғәҙәттә, был тормошта кемгә бурыслы булыуың тураһында төп­сөнәләр, – тип һөйләй отстав­калағы полковник, Бөрө район советы секретары Илнур Әҙеһәмов. – Әлбит­тә, башта атай-әсәйемә сикһеҙ рәх­мәтлемен. Улар миңә ғүмер бүләк иткән, аяҡҡа баҫ­тырған, башлы-күҙле иткән. Яҡын­дарымдың белем алыуға йүнәлеш биреүе, халҡым­дың йолаларын һәм ғөрөф-ғәҙәт­тәрен өйрәтеүгә ынтылыш уятыу­ҙарын бер ҡасан да онотмая­саҡ­мын. Бәләкәй саҡта ойошторолған бихисап күңелле байрамдар күңелемдә ныҡ уйылып ҡалған.

Әңгәмәсем башҡорт халҡына хас “ҡаҙ өмәһе”, “ҡарға бутҡаһы” кеүек байрамдарҙың гөрләп уҙы­уын, өлкәндәрҙең бәләкәстәрҙе уларҙың һәр береһендә әүҙем ҡатнаштырыуын билдәләне. Бары­һының да ойошҡан үтеүенә уҡы­тыу­сыларҙың күп көс һалыуын да айырым билдәләне. Әйткәндәй, ул мәктәптә лә, юғары уҡыу йортонда ла белем биргән уҡытыусы­ла­ры­ның береһен дә айырып ҡарамау яғында, шуға күрә бөтәһен дә йылы һүҙҙәр менән генә һанап сыҡты.

Илнур Флүс улы билдәләүенсә, бигерәк тә һуңғы ваҡытта мил­ләттәштәренең тарихи тамырҙарын барлауы, асылына ҡайтыуы һөйөнөслө. Был тәңгәлдә “Шәжәрә” байрамы ҙур роль уйнай.

Илнур Әҙеһәмов оҙаҡ йылдар Өфө ҡалаһында ғүмер кисергән. Тыуған яғынан ситтә йәшәһә лә, ул Бөрө районындағы, шулай уҡ Яңы Яндыҙ ауылындағы яңылыҡ­тар менән даими ҡыҙыҡһынып торған, йыш ҡына ярҙам ҡулы һуҙған. Быны ул башҡорттарҙың киң күңелле, ярҙамсыл сифаттары менән бәйләй. Ояһында ни күрһә, осҡанында шул булыр тигән мәҡәлдәгесә инде.

– Бөгөнгөләй хәтеремдә, беҙ күршеләребеҙ менән бик татыу йәшәнек, – тип тамамланы һүҙен Илнур Флүс улы. – Картуф сәсеү йәки ҡаҙыу, һуғым һуйыу, бүтән төрлө эштәрҙе һәр ваҡыт күмәк­ләшеп башҡара торғайныҡ. Ә өмә­ләр һуң! Ошо өмәселәрҙең дәртле һәм әүҙем булыуына һоҡлана инем. Яңы Яндыҙҙағы бөтә йорттар ҙа тиерлек өмә ысулы менән күтәрел­де. Шунан сығып, “берҙәмлектә – көс!” тимәй ҡара! Шуны беләм, хәҙер ҙә ҡайһы бер ғөрөф-ғәҙәттәр, йолалар беҙҙең ауылда һаҡланған. Өлкән быуын кешеләренең уларҙы йәштәргә еткереүе һөйөндөрә.

Илнур Әҙеһәмов менән хушлаш­ҡанда, ул тыуған яҡ менән бәйлә­неште өҙмәҫкә, һәр саҡ маҡсатҡа ынтылып йәшәргә, алдынғы булырға өндәне.