+20 °С
Болотло
Әҙәбиәт һәм мәҙәниәт
23 Ноябрь 2020, 08:30
Стәрлеләр бейеү тамашаһына саҡыра
Бейеү театры “Дуҫлыҡ күпере аша” тип исемләнгән концерт тәҡдим итә
Стәрлетамаҡ дәүләт театр-концерт берләшмәһендә “Цифрлашҡан мәҙәниәт” төбәк проекты сиктәрендә булдырылған Виртуаль концерт залы асылыуы көтөлә. Ошо уңайҙан 26 ноябрҙә киске етелә Бейеү театры “Дуҫлыҡ күпере аша” тип исемләнгән концерт тәҡдим итә.
“Байрам кисәһе заманса мультимедиа ҡорамалдары – проектор, киң форматлы экран, акустик система менән йыһазландырыла. Юғары тиҙлектәге интернет аша дәртле тамашабыҙҙы сит өлкәләрҙә йәшәгән яҡташтарыбыҙ ҙа тура эфирҙа ҡарай ала. Программала халыҡтың һөйөүен яулап өлгөргән «Башҡортостан», «Бөрйән егеттәре», рус, татар, сыуаш, ҡалмыҡ, марий, чечен, ҡаҙаҡ халыҡ бейеүҙәре һәм башҡа хореографик композициялар көтөлә. Талантлы коллектив сәхнәгә беренсе тапҡыр ҡаҙаҡ һәм татар халыҡ бейеүҙәрен дә алып сыға”, – тип хәбәр итә Лиана Ямалетдинова, Стәрлетамаҡ дәүләт театр-концерт берләшмәһенең әҙәби бүлеге мөдире.
Бейеү театры ижадсылары матур, ялҡынлы бейеүҙәре менән тамашасыларҙы ҡыуандырып ҡына ҡалмай, улар аша күп милләтле халҡыбыҙ араһында татыулыҡты нығытыуға, һаҡлауға ла үҙ өлөшөн индерә.
Стәрлетамаҡтарҙың дәртле тамашаһын ҡарап, илһам алырға онотмағыҙ, дуҫтар!
Фото: СДТКБ.
