+20 °С
Ямғыр
Әҙәбиәт һәм мәҙәниәт
2 Март 2021, 08:24
“Аҡбуҙат”та бергәләп еләйек!
Республика балалар журналы сыға башлауға – 30 йыл.
“Аҡбуҙат” – боронғо эпостың исемен йөрөткән, Башҡортостан Республикаһының йөҙөн билдәләгән баҫмаларҙың береһе. Тәрбиәүи, әҙәби, тарихи мәғлүмәттәрҙе туплаған, айына бер тапҡыр сыҡҡан башҡорт телендәге журналдың аудиторияһы – донъяға саҡ тауыш биргән кескәй башҡорттан алып башланғыс класс уҡыусыларына тиклем. Тәүге баш мөхәррире – Башҡортостандың халыҡ шағиры Факиһа Туғыҙбаева. Унан һуң баҫманы Тамара Юлдашева етәкләгән.
Журнал күп тапҡыр Мәскәүҙә үткән “Матбуғаттың алтын фонды” халыҡ-ара күргәҙмәһендә иң шәп баҫма булараҡ билдәләнгән. 2012 йылда “Аҡбуҙат” илдең кескәйҙәр өсөн сығарылған баҫмалары араһында Рәсәй Журналистар союзы ойошторған “Бәләкәй принц” Бөтә Рәсәй конкурсының еңеүсеһе булған.
2020 йылдың сентябрендә ул Башҡортостан Башлығы грантына “Урал батыр” йәнһүрәтен сығарҙы. Ошо уҡ йылда Пермь өлкәһендә йәшәгән Ғәйнә ырыуының кескәй башҡорттары өсөн 13-сө һан нәшер ителде. Башҡорт теле йылында редакция хеҙмәткәрҙәре республиканың ике дәүләт телендә “Ҡояш ҡыҙы иленән” китабын баҫтырыуға өлгәште. Унда журнал тарафынан ойошторолған конкурста еңгән балаларҙың шиғырҙарын Рәсәйҙә билдәле яҙыусылар – Рәсәй Яҙыусылар союзы секретары Нина Ягодинцева, Дағстандың халыҡ шағиры Марина Ахмедова-Колюбакина, Башҡортостанда билдәле шағирҙар Сергей Янаки, Светлана Чураева, Кристина Андрианова, “Корифейҙар” фестивалендә ҡатнашҡан Юрий Татаренко, Евгения Решетникова тәржемә итте.
“Аҡбуҙат”ты республикабыҙҙа йәшәгән бәләкәс милләттәштәребеҙ уҡый. Быйыл баҫма яңы ойошторолған тарихи-мәҙәни үҙәктәр ярҙамында альтернатив яҙылыу нигеҙендә Свердловск, Ырымбур, Силәбе, Һамар, Һарытау өлкәләрендә, Пермь крайында, Ханты-Манси автономиялы округында йәшәгән бәләкәстәргә лә барып етәсәк.
Журнал бөгөн баҫма вариантта ғына түгел, электрон форматта, социаль селтәрҙәр аша ла үҙ уҡыусыһына юл таба. Интернетта “Аҡбуҙат” тарафынан конкурстар ойошторола, шуға башҡорт телендә тарихи, мәҙәни, тәрбиәүи мәғлүмәт таратыуҙа, тотош милләттең киләсәген үҫтереүҙә уның әһәмиәте ҙур.
Бөгөн баҫмала балалар яҙыусылары Миңлегөл Тайсина, Зөбәйҙә Исламова, Гөлнара Мостафина, йәш быуын шағирәһе Айгөл Ғәбитова (Йәмилева) эшләй.
Кескәйҙәр өсөн сағыу һәм тәрбиәүи әһәмиәткә эйә булған һүрәттәрҙе республикала ғына түгел, Рәсәйҙә билдәле рәссамдар Азамат Ғарипов, Сулпан Билалова, Майя Ҡәйүмова, Артур Вәсилов, Салауат Ғиләзетдинов, Лиана Ниғмәтйәнова, Сергей Эйтвид, Ирина Әхмәҙуллина, Дамир Мөхәмәтйәров эшләй. Беҙҙең ишектәребеҙ ҙә, йөрәгебеҙ ҙә һәр уҡыусыға, башҡорт милләтенең кескәй вәкилен үҙ асылыбыҙҙа тәрбиәләргә теләгән һәр кемгә асыҡ. Бергәләп еләйек “Аҡбуҙат”та!
