+21 °С
Болотло
Әҙәбиәт һәм мәҙәниәт
2 Март 2021, 06:46
Рәхмәт һүҙе
Ҡәҙерле дуҫтар!Һәммәгеҙгә мәғлүмдер, ошо көндәрҙә республикабыҙ Башлығы Указы менән миңә “Башҡортостандың халыҡ шағиры” тигән маҡтаулы исем бирелде. Шул уңайҙан бик күп ҡәләмдәштәрҙең, әҙәбиәт һөйөүселәрҙең, ижади ойошмаларҙың, матбуғат сараларының, китапхана коллективтарының ҡотлау хәбәрҙәрен алып ҡыуандым.
Ҡәҙерле дуҫтар!
Һәммәгеҙгә мәғлүмдер, ошо көндәрҙә республикабыҙ Башлығы Указы менән миңә “Башҡортостандың халыҡ шағиры” тигән маҡтаулы исем бирелде. Шул уңайҙан бик күп ҡәләмдәштәрҙең, әҙәбиәт һөйөүселәрҙең, ижади ойошмаларҙың, матбуғат сараларының, китапхана коллективтарының ҡотлау хәбәрҙәрен алып ҡыуандым. Республиканың барлыҡ район-ҡалаларынан ғына түгел, хатта Рәсәйҙең төрлө төбәктәренән, сит илдәрҙән шылтыратыусылар, яҙыусылар булды.
Әҫәрҙәремде ҡағыҙға төшөргән хәләл ефетем Гөлсөм, уларҙы матбуғатҡа әҙерләп биргән яҙыусы улым Алмас, барлыҡ туғандарым һәм яҡындарым исеменән барыһына ла рәхмәтемде еткерәм.
Республика Башлығы Радий Фәрит улы Хәбировҡа, дәүләт наградалары буйынса комиссия ағзаларына, Хөкүмәтебеҙгә, миңә маҡтаулы исем биреү тәҡдимен белдергән яҡташтарым – Стәрлебаш районы халҡына, хакимиәтенә һәм Советына, хакимиәт етәксеһе Рөстәм Камил улы Рахманғоловҡа, был тәҡдимде хуплаған ҡәләмдәштәргә, әҙәбиәт һөйөүселәргә, төрлө ойошмаларға, коллективтарға айырыуса ҙур рәхмәт.
Матур ваҡиғаны күтәреп, мине ҡотлап, ихлас теләктәре менән ҡыуандырған “Башҡортостан”, “Кызыл таң”, “Йәшлек”, “Өмет”, “Республика Башкортостан” гәзиттәре, “Ағиҙел”, “Тулпар”, “Һәнәк”, “Аманат” журналдары, минең ҡәҙерле “Стәрлебаш шишмәләре” гәзите, башҡа район һәм ҡала гәзиттәре коллективтарына, Зәйнәб Биишева исемендәге “Китап” нәшриәте, радио һәм телевидение хеҙмәткәрҙәренә, социаль селтәрҙәрҙә ҡотлаған иптәштәргә рәхмәт.
Һеҙ барығыҙ ҙа миңә йәшәргә һәм ижад итергә көс бирҙегеҙ. Әле “Китап” нәшриәтендә “Һайланма әҫәрҙәр”емдең өсөнсө томы донъя күрергә әҙерләнеп ята. Ә беҙ Гөлсөм менән инде дүртенсе томына керештек. 91-се йәшемдә яңы ижади пландар, ҡыуаныстар менән йәшәйем.
Донъялар имен булһын! Республикабыҙ сәскә атһын!
Барығыҙҙы ла ихтирам итеп, Рауил ШАММАС.
