Шағирҙы шағир иткән – шиғыр!

Әсәй менән мәтрүшкәләр йыйҙыҡ,

Бар донъяны алды хуш еҫе.

Йырлай-йырлай йыйған шул мәтрүшкә –

Йәмле йәйҙең сағыу бер төҫө.

Көлә-көлә йүгерә бала сағым,

Ә ҡулында алһыу мәтрүшкә,

Шуға күрә, ахыры, йыйғанда ла

Мәтрүшкәләр, гүйә, көлөшә.

Уҙып бара, эйе, бала сағым,

Уңып бара йәйҙең сағыуы.

Мөғжизә бит, әсәй ҡулындағы

Мәтрүшкәнең көләс ҡалыуы.

Айһылыу ДАУЫТОВА,

Ишембай районы.

Тел осонда тыпырлатып,

“Яратам” һүҙе бейей.

Кәйелеп осоп ҡолағыңа

Килеп ҡунырға йөрөй.

Тик ирендәр сығармайҙар,

Көт әле, тиҙәр, янһын.

Мөхәббәттән дөрләй йөрәк:

Нишләргә? Сыҡты янғын!

Кис, болонда ултырғанда,

Йәнә әйтмәнем, түҙҙем.

Иртәгәһен, бәлки түҙмәй

Әйтерһең, тиеп, үҙең.

Алина ӘХМӘТШИНА-СУРАҒОЛОВА,

Саҡмағош районы.

***

Эйек буйҙарында балан уңған,

Тәлгәш-тәлгәш ярға бөгөлөп.

Ҡырауҙарға бирешмәгән улар

Нығынғандар көҙҙән һөйөлөп.

Һалҡын төшкән һайын ҡыҙаралар,

Өлгөрәләр һаран ҡояштан.

Һәр бер нурҙан йәшәү көсө ала,

Ҙур ҡыуаныс яңы атҡан таң.

Һылыу ҡыҙҙың һутлы иренеләй,

Уттай янып бешкән баландар.

Хисләнеп бер йөрөп ҡайттым әле

Эйек буйҙарында, яланда.

Ғинуарҙа күктән ямғыр яуа,

Шартлап торған һыуыҡ ҡайҙа ул?

Ҡыштар-яҙға, йәйҙәр-көҙгә оҡшаш,

Ахыры, бик ҙур гонаһ алғанбыҙ.

Ҡайҙа шаулап торған урман яна,

Океандарҙан килә ураган.

Сүллектәрҙә нишәп ҡарҙар яуа?

Йылы яҡтар туңа бурандан.

Тәбиғәт тә күреп, түҙеп-түҙеп

Вәхшилекте үҙенә ҡарата.

Әрнеүҙәргә түҙә алмайынса,

Өлөш бүлеп, ҡабат тарата.

Руслан АБДУЛЛИН,

Күгәрсен районы.

Осһоҙланған Кешелеккә ҡарап

Эй һыҙланды бөгөн Асмандар:

Тыумай микән әллә был заманда

Күкрәктәрен йыртып асҡандар!?

Кешеләргә кеше дошман бөгөн,

Көслөләргә йәшәү хөрриәт.

Ата улын белмәй, инә - ҡыҙын,

Туғанына туған – ете ят.

Ҡиммәттәрҙең ҙуры - усҡа йомоп,

Кеҫәләрен һәлмәк иткәне.

Сытырайтып күҙен йома әҙәм,

Оноторға була үткәнен.

Үткәнендә, белә - тауҙар торған,

Йырлап аҡҡан шишмә, йылғалар.

(Ҡул һуҙғанда кеше һиҙмәгәндер,

Заманалар былай болғаныр...)

Иман юлы таҡырайҙы былай.

Тик яртыһы булыр монафиҡ.

Битен һыйпап, күккә баҡҡандарҙың

Яңғыҙ ҡалдыниһә – тән асыҡ.

Оятынан Ҡояш ҡамала ла,

Яраһына һала ямауын.

Ни заманда ҡалды кешеләрҙең

Йәне тәнгә үтеп яныуы?

Ни заманда ҡалды һипкел тиеп,

Хыялыйҙың ипкен тиргәне.

Ситтә бөгөн ҡояш эҙләй халыҡ.

(Үҙебеҙҙең Ҡояш эй талпынды,

Береһе бер кисә күрмәне).

Күкрәк йыртып йөрәк һоноусы юҡ.

Кеше бөгөн Ерен йыртҡыслай.

Ҡорбанының йылы ҡанын тойоп,

Нәфселәре аҙған йыртҡыстай.

Аҡтарылып ҡала арттарынан.

Буҙлап ҡына илай Ер – Әсә! -

Тәпәйеңде шуға йылыттыммы,

Туңһын өсөн минең күрәсәк?!

Яп - яланғас бөгөн бәғзеләрҙең

Күктәр бүләк иткән күңеле.

...Эй һин бәндәм!

Күндәм булһаңсы тип,

Төңөлмәгән Йыһан түгелә...

Наилә ХӘМБӘЛИЕВА,

Учалы ҡалаһы.

***

Төпкөл уйҙарымдың күрәм
Сағылышын һүҙеңдә.
Минең күңел тыныслығын
Йөрөтәһең үҙеңдә.

Ҡарашың менән көндәрҙең
Аҡлайһың ҡараларын.
Тауышың ғына ла имләй,
Күңелем яраларын.

Әмәлдәрен һин табырһың,
Дауаларым - ҡулыңда.
Бар бәхетем һинең өсөн
Көсһөҙ генә булыуҙа.

Шәүрә ТУЙСИНА,

Сибай ҡалаһы.

Сит ерҙәргә әйҙәнең:

Диңгеҙ буйы, караптар.

Мин әйтергә ҡыйманым,

Яратам, тип пар аттар.

Өҫтәлемә теҙҙең ризыҡ,

Белмәйем мин исемен.

Утта бешкән бәрәңге, тип

Үлә яҙған кешемен.

Хушбуйҙарың ҡыйбаттыр,

Бер тамсынан иҫерәм.

Белһәң ине: ләззәт алам,

Ҡара мунса еҫенән.

Әсе ҡорот тәмләттем дә,

Мәтрүшкәле сәй ҡойҙом.

“Үҙ тапандым, уф”- тиеп,

Еңел һулап һин ҡуйҙың.

Ләйсән СӘЛИМОВА,

Ғафури районы.

Кистәр етһә, күңел төпкөлөндә

Әллә ниндәй хистәр уяна.

Йә ҡыуанам юҡ-бар сәбәп табып,

Йә һағышҡа сумып, уйланам...

Әллә көндөҙ йондоҙ күрмәгәнгә,

Йүгәнлеме икән хыял-ат?

Кистәр етһә, тыйып ҡына булмай,

Уйҙарыма ҡуна пар ҡанат!

Көндөҙ тоймағанды кисен тоям,

Һәр бер хәлдә - тәрән мәғәнә...

Көндәр, ахыры, хеҙмәт итеү өсөн,

Күңел өсөн тик шул мәл генә!

Ярай әле, серле кистәрем бар!

Килендәр бар, бергә сәйләргә...

Көлә-көлә, ҡайсаҡ һағышланып,

Быуындарҙы бергә бәйләргә...

Күңелдәрҙең моңон әйләргә...

Сәкинә ТОТМАНОВА,

Баймаҡ районы.

Гармун тотһаң, моңға тула,

Балҡый төҫлө өй эсе:

Ҡыҙҙарыбыҙ төшөп китһә,

Ары торһон бейеүсе!

Эх, бейей бит ҡыҙҙарым,

Һай, килешә ҡайһылай!

Ә атаһы, атаһысы –

Ана шулай, бер йылмай!

Бейегәнгә дәрт өҫтәлер,

Кәйефе лә булыр шәп!

Атай гармун тартҡан саҡта

Бейемәҫкә, ти, нишләп?!

Мин алҡышлап торамын,

Тамашасымын ябай.

Ә шулай ҙа күңел бейей,

Күңел йырлай туҡтамай!

Зарина БАҒЫШАЕВА,

Йылайыр районы.

Шылтыратам мин улыма,

Белгем килә уның хәлен.

Трубка алам мин ҡулыма,

Табып берәй уңай мәлен.

Ғорурланам балам менән,

Бара бейек үрҙәргә.

Ләззәт таба ул эшенән,

Файҙа килтерә ергә.

Етмәй миңә бәхет өсөн

Хоҙайҙан тик бер нәмә:

Балам телефонын алып,

Ҡыҫҡа ғына әңгәмә.

Бөтәһе лә етеш минең,

Етерлек аҡсалары.

Һөйләшергә балам менән

Үтенесем тик бары.

Шылтыратһам килә яуап,

"Перезвоню мин һиңә".

Кистәр буйы ятам уйлап,

"Шылтыратмай был ниңә?"

Рәхәт ине минең заман,
Яҙыша инек хаттар.
Ҡайтыр ине бөтә туған
Егеп һәр төрлө аттар.

Бөгөн бына етеш ғүмер,
Тик иғтибарҙан мәхрүм.
Эх, булмаҫҡа ине хәҙер
Балалар онотҡан мәрхүм.

Әсғәт ЙӘҺҮҘИН,

Әбйәлил районы.

***

Япраҡтарҙы күптән ел осортҡан:

"Үҙ йүнеңде, әйҙә, үҙең күр".

Тыуған тамырҙарһыҙ түҙерлекме -

Бер өҙөлгәс, тартып алды ер.

Ул, йүләрҙәр, донъя күрәм, тиеп,

Ысҡынғандыр, бәлки, оянан.

Кибеп, һарғайышҡас, хәле еткән

Ауыр өсөн түбән туранан.

Балаларын яңғыҙ ҡалған ағас

Орошҡандай була, сайҡалып:

"Бәхетле лә була алырһыңмы,

Тыуған ерҙән ситтә йәм табып?"

Лилиә АЛТЫНҒУЖИНА (ҠАҺАРМАНОВА),

Бөрйән районы.