+20 °С
Болотло
Әҙәбиәт һәм мәҙәниәт
18 Март 2021, 10:00
Зәңгәр күҙҙәр
Төркөмдәштәр! Әйҙәгеҙ, көн дә төшкө сәғәт 3-тә ошонда осрашайыҡ һәм был хикәйәне бергәләп яҙайыҡ. Теләгән һәр кем оҙон итмәй генә уның үҙе уйлаған дауамын төркөмдәге "Сообщение" тигән төймәгә баҫып ебәрә ала. Ҡыҙыҡлы тип табылған өҙөк иртәгәһенә баҫылып сығыр. Шулай мөхәббәтле тарих тамамланғансы дауам итер. Башланыҡмы?Хикәйәнең башын ошо һылтанма буйынса инеп уҡығыҙ:
Фәриттең алдында торған ҡатын, аптека тәҙрәһенә эйелә биреберәк, ҡулындағы ҡағыҙына ҡарап алды ла: «Ноотропил бармы?» – тип һораны. Провизор ҡыҙ: «Бер минут», – тип компьютерына текәлде. Бер аҙҙан: «Бар, дүрт йөҙ һум», – тигән тауыш ишетелде. Ҡатын ауыр итеп көрһөнөп: «Бигерәк ҡиммәт икән, – тип ҡуйҙы. – Ә осһоҙораҡ шундай уҡ дарыу юҡмы?»
Былай ҙа ҡабаланған Хәнифтең түҙемлеге шартлап һынды. Киҫкен тауыш менән:
– Пирацетам алығыҙ, ханым! Кү-үпкә осһоҙораҡ! – тине.
Тертләп киткән ҡатын, өтәләнеп, «зинһар өсөн, ике ҡап пирацетам» тип һөйләнә-һөйләнә янсығынан аҡсаһын тартып сығара башланы.
Уф, ниһайәт, сираты етте ирҙең. Тауышы бойороҡ биргәндәй яңғыраны:
– Йод, зелёнка, бинт!
Иҫәпләшеп, тышҡа сығыуына тупһала теге ҡатын менән йөҙгә-йөҙ осрашты. Осрашты ла зәңгәр күлдәй күҙҙәр упҡынына осто… Ҡайҙандыр алыҫтан бәрхәттәй тауыш аҡланғандай ишетелде:
– Рәхмәт инде Һеҙгә. Дарыуҙар бигерәк ҡиммәт бит хәҙер. Ә улар көн дә кәрәк...
Фото: s-zametki.ru
