“Беҙҙең ишектәр һәр саҡ асыҡ!”

Саҡмағош үҙәк моделле китап­ха­наһы хеҙмәткәрҙәре һәм уларҙың башҡарған эштәре менән танышыу бөтә икеләнеүҙәрҙе юҡҡа сығарҙы. Әҙәбиәттең ҡәҙере баһалы, уның күп ғаиләләрҙә элеккесә көтөп алынған ҡунаҡ икәнен күреп һөйөндөк, хеҙмәткәрҙәрҙең китап таратып ҡына ултырмағанын, ә халыҡ араһында ни тиклем ҙур аңлатыу, күңел асыу, мәғлүмәт биреү, саралар үткәреү эшмәкәр­леген дә үҙ өҫтөнә алыуын асыҡ күрҙек. Йәмғиәт өсөн әһәмиәтле маҡсатлы программаларҙы тор­мошҡа ашырыу буйынса планлы эш дәррәү дауам итә, хатта пандемия ла әллә ни ҡамасаулай алмаған. Шуларҙың бер нисәһе: “Башҡортостан – әҙәбиәт, мәҙәниәт, традициялар”, “Башҡортостан ха­лыҡтарының берҙәм ғаиләһендә”, “Яҙмышта ҡатнашыу”, “Китапхана һәм йәштәр: киләсәккә китап менән…”

Саҡмағоштағы үҙәк китапханала электрон уҡыу залы, автоматлаш­тырылған эш урындары, Милли электрон китапханаға һәм башҡа мәғлүмәт ресурстарына тоташыу мөмкинлеге бар. Хәҙер ул үҙ ҡаҙанында ғына ҡайнамай, ә төрлө учреждениелар – Мәҙәниәт йорттары, балалар сәнғәт мәктәптәре, ижад үҙәктәре, йәштәр бүлектәре, матбуғат баҫмалары менән ҡулға-ҡул тотоноп эшләй. Яңы быуын китапханаһы зауыҡлы биҙәлеше, уҡыусы өсөн күп уңайлыҡтар булдырыуы менән дә айырыла.

Саҡмағош моделле китапхана­һы директоры Рәсимә Балягова беҙҙе былтыр асылған, зауыҡ менән йыһазландырылған балалар моделле китапханаһы менән таныш­тырҙы. Рәсәй Президенты Грантына ойошторолған конкурста ҡатнашып, 497 мең һум аҡса алыуға өлгәшкәндәр. Китапхана телевизор, фотоаппарат, йомшаҡ ултырғыстар, дидактик материалдар, төрлө уйын ҡорамалдары алған. Июнь айында сенсор-библиотерапия бүлмәһен асыу танта­наһына ата-әсәләр балалары менән килгән.

– Кескәйҙәр беҙгә ҙур теләк, ҡыҙыҡһыныу менән йөрөй, – ти баш китапханасы Илмира Хәмит ҡыҙы. – Ниндәй ғәмәл күңелдәренә яҡын – шуның менән шөғөлләнә­ләр: төҫлө буяуҙар менән һүрәт төшөрәләр, төрлө һындар әүәләй­ҙәр, гимнастика яһайҙар, йәнһүрәт ҡарайҙар, әкиәт уҡыйҙар… Бик күңелле хәҙер кескәйҙәр менән шөғөлләнеү. Әкиәт геройҙарының сағыу костюмдары ла бар, мауыҡ­тырғыс өҫтәл уйындары, иғтибарҙы йәлеп итерлек матур тышлы китаптар балаларҙы магниттай үҙенә тарта. Кемгә ниндәй рухи аҙыҡ кәрәк – беҙҙә барыһы ла етерлек.

Китапханасы Зөлфиә Ғәйнетди­нова – бөтә ғүмерен тигәндәй яратҡан һөнәренә арнаған, ҙур тәжрибә туплаған белгес. “Элек бибколлекторҙар менән тығыҙ бәйләнештә эшләнек, халыҡтың һорауы буйынса ғаризалар бирә торғайныҡ. Ошо системаның бөтөрөлөүе арҡаһында хәҙер төрлө тармаҡҡа ҡағылған баҫмаларҙы алыу ҡыйынлаша. Китап фондыбыҙ ярайһы ғына ҙур – 56 мең дана. Уны төрлө тармаҡ эшмәкәрлеген үҙ эсенә алған баҫмалар менән дә тулыландыраһы ине”, – тигән теләген дә белдерҙе тәжрибәле китапханасы.

Саҡмағош китапханасыларының район тормошонда ҡайнап йәшәүе­нә миҫалдарҙы әллә ҡайҙан эҙ­ләйһе лә түгел, һуңғы бер-ике йылда үткәргән сараларға ғына күҙ һа­лайыҡ. Хеҙмәткәрҙәр һуңғы йыл­дарҙа проект-грант эшмәкәрлеге менән әүҙем шөғөлләнгән. 2018 йыл­да Рәсәй Президенты Грантына ойошторолған тәүге конкурста “А-фишка. Сенсор бүлмәһе элементтары менән мини-кинотеатр” проектын тәҡдим итеп ҡатнашалар.

Шулай уҡ Бөтә Рәсәй конкурсынан ситтә ҡалмайҙар. Үҙәк китапхана ойошторған “Игеҙәктәр-биҙәктәр”, “Ғаилә тормошо пазлы”, “Ғаилә ижа­ды” һәм Сәскәләр байрамы әле лә саҡмағоштар күңелендә матур ваҡиға булып һаҡлана. Яҡташтары, яҙыусы Вәзих Исхаҡовтың ижады буйынса йыл да әҙәби конкурс ойоштороп, әҙиптең ҡыҙы, ғалим Венера Исхаҡова ҡатнашлығында йөкмәткеле саралар ҙа ойоштор­ғандар.

Балалар моделле китапханаһы­ның баш китапханасыһы Илмира Шафиҡова республика конкурсында аҡсалата премияға, ә китапханасы Алһыу Гәрәева үҙешмәкәрлек смотрында III дәрәжә дипломға лайыҡ булған. Был дәртле, тын­ғыһыҙ ҡатын-ҡыҙҙар “Эшкә – велосипедта” тип аталған Бөтә Рәсәй акцияһында ҡатнашырға ла йөрьәт итә, районда үткәрелгән велопарадта күмәкләшеп ҡатнаша. Билә­мәлә үткәрелгән бер байрам, һа­бан­туйҙар, өмәләр, танылған шә­хестәр юбилейҙары китапханалар ҡатнашлығынан башҡа үтмәй.

Хәҙерге заман моделле китап­ханаһының яңы мөмкинлектәр бүләк иткән, асыштар донъяһы менән таң ҡалдырған идеялар сы­ғанағы булыуына тамам ышандыр­ҙы был сәфәр. Бынан тап йөҙ йыл элек Саҡ­мағош районының Иҫке Ҡалмаш ауылында асылған беренсе китапханала 250 бөртөк китап халыҡ араһында аң-белем таратыуға хеҙмәт итһә, хәҙерге мөмкинлек­тәрҙән хатта баштар әйләнерлек! Бары ошо рухи байлыҡтан файҙа­ланырға өйрәнергә, аң-белем даи­рә­һен байытырға ынтылырға ғына кәрәк. Саҡмағош үҙәк китапханаһы хеҙмәткәрҙәре был йәһәттән күңе­лең теләгән аҙыҡты эҙләп табы­шыр­ға мотлаҡ ярҙам итәсәк.

Саҡмағош районы.