+20 °С
Болотло
Әҙәбиәт һәм мәҙәниәт
19 Май 2021, 15:30
Мәҙәни проекттарға – дәүләт Башлығы гранттары
Президент Владимир Путин 17 майҙа “Мәҙәни башланғыстарҙың Президент фондын төҙөү тураһында”ғы Указға ҡул ҡуйған.
Рәсәй Федерацияһы Президенты Владимир Путин 17 майҙа “Мәҙәни башланғыстарҙың Президент фондын төҙөү тураһында”ғы Указға ҡул ҡуйған. Ул хоҡуҡи мәғлүмәттәр баҫылып сыҡҡан рәсми интернет-порталда урынлаштырылған.
“Мәҙәниәт, сәнғәт һәм креатив (ижади) индустрияларға ярҙам йөҙөнән Мәҙәни башланғыстарҙың Президент фондын төҙөү маҡсатҡа ярашлы тип иҫәпләргә ҡарар итәм”, – тиелә документта. Фондтың ойоштороусыһы (учредителе) тип Гражданлыҡ йәмғиәтен үҫтереү буйынса Президент гранттары фонд-операторы билдәләнә. Ул мәҙәниәт, сәнғәт һәм креатив (ижади) индустриялар өлкәһендә коммерция ойошмалары, шулай уҡ коммерцияға ҡарамағандары, шәхси эшҡыуарҙар тормошҡа ашырған проекттарға булышлыҡ итәсәк. Фонд конкурстар үткәреп, уларҙың һөҙөмтәләре нигеҙендә Президент гранттарын алырға лайыҡлы ойошмаларҙы билдәләйәсәк. Быйылға ойоштороусыға телгә алынған проекттарға ярҙам итеү өсөн фондҡа 3,5 миллиард һумлыҡ Президент грантын конкурсһыҙ биреү рөхсәт ителгән.
Указда шулай уҡ Президент гранттарын биреүгә конкурстар үткәреү буйынса координация комитеты составы ла раҫланған.
Иҫегеҙгә төшөрәбеҙ: илдә Мәҙәни башланғыстар фондын булдырыу тураһында Рәсәй Президенты Федераль Йыйылышҡа Мөрәжәғәтнамәһендә белдергәйне.
Фото: "Башинформ".
