Славян моңдары яңғыраны

Славян яҙмаһы һәм мәҙәниәте көнөнә арналған сарала Башҡортос­тандың төрлө район-ҡалаларынан йыйылған халыҡ, өлгөлө, фольклор ансамблдәре йыр-моң менән сығыш яһаны.

Бай концерт программаһынан тыш, фестиваль бар яр буйын ялмап алған: сағыу күргәҙмәләрҙән күҙ ҡамаша, интерактив майҙандар, оҫталыҡ дәрестәре үҙенә әйҙәй, ә бәләкәстәр өсөн махсус театрлаштырылған майҙансыҡтар булдырылған.

Ҡунаҡтарҙы иң тәүҙә “Рус ихатаһы” исемле экспозиция ҡаршыланы. Балаҡатай районы оҫталары бында ысын рус ихатаһын тергеҙеүгә өлгәш­кән: сынъяһау өй алдында өс ҡатын ҡул эштәре менән булыша, ир-егеттәр йорт-ҡура тирәһендәге эштәр менән мәшғүл. Ҡапҡа янында һылыу ҡыҙҙар теләгән һәр кемде славян йолаһына ярашлы икмәк-тоҙ менән ҡаршы алып тора.

Яр буйындағы сәхнәнән яңғыраған йыр-моң һәр кемде яҡыныраҡ килеп тыңларға саҡыра. Ҡырмыҫҡа иләүе шикелле гөжләгән ҡатнашыусылар араһына инеп, бер-икәүһе менән аралашырға насип булды.

“Былинушка” өлгөлө ансамбле Бәләбәй яҡтарынан килгән. Рус милли кейемендәге үҫмер ҡыҙҙар кемуҙарҙан ҡасан ансамблдә шөғөлләнә башла­ғандарын һөйләй: кемдер дүрт, кемдер хатта, үҙҙәре әйтмешләй, “тыу­мыштан” бында икән.

“Раздолье” хор ансамбле иһә 78 йыл эшләп килеүе менән ғәжәп­ләндерҙе.

“Өфө ҡалаһының “Моторостроитель” мәҙәниәт йорто базаһында шөғөлләнәбеҙ. Мин үҙем ансамблгә 40 йыл етәкселек итәм. 78 йыл дәүерендә ансамблдең репертуары төрлө йырҙар менән байыны. Халыҡ та, эстрада ла йырҙарын башҡа­рабыҙ”, – тип һөйләне ижади төркөм етәксеһе Любовь Богатырева.

Фестивалгә йыйылған халыҡтың бер өлөшө концерт ҡарап кинәнһә, бер өлөшө күргәҙмәләр буйлап һибелгән. Бында ҡыҙыҡлы нөктәләр күп: ҡул эштәре буйынса оҫталыҡ дәрестәре лә күрһәтәләр, оҫталар үҙҙәре ижад иткән эштәрен дә һатыуға тәҡдим иткән.

М. Кәрим исемендәге Милли йәштәр театры актрисаларын да осраттым: Зөлхизә Абдуллина, Аида Күлбаева славян милли кейемдәрендә кешеләр менән аралаша, уларға славян мәҙәниәте, тарихына бәйле һорауҙар яуҙыра, дөрөҫ яуап өсөн тәмлекәстәр тарата.

Баш ҡаланың “Хахачу”, “Дебуфо” театрҙары бында ижади сығыштар йәйелдергән.

Концерт программаһының көтөп алынған ҡунаҡтары – “Узорица”, “Счастливые люди” коллективтары. Шулай уҡ сараны сығышы менән Санкт-Петербург ҡалаһынан саҡырыл­ған “Отава Е” төркөмө биҙәне.