“Ашҡаҙар”ҙа ҡунаҡта – Ринат Рамаҙанов

Республиканың “Ашҡаҙар” радиоһы Ә. Вәлиди исемендәге Милли китапхана менән берлектә “Онотолмаҫ осрашыуҙар” проектына ярашлы киләһе сараны ойошторҙо. Башҡортостандың атҡаҙанған артисы, ҡурайсы, “Арғымаҡ” төркөмө етәксеһе Ринат Рамаҙановты күптәр үҙ итә.

“Сараларға әлегә өлкәндәрҙе тү­гел, йәштәрҙе саҡырабыҙ, был коро­навирус менән бәйле. Киләһе ҡу­наҡтар ҙа – бик ҡыҙыҡлы шә­хестәр”, – тине “Ашҡаҙар” радиоһы­ның баш мөхәррире Гәүһәр Батталова.

Башҡортостандың атҡаҙанған артисы Ринат Рамаҙанов – Мәләүез ҡалаһы егете. Бәләкәйҙән йыр-моңдо яратҡан. Үҙе һөйләүенсә, сабый сағында мыжый башлаһа, уны музыка ҡуйып тынысландырғандар. Телевизорҙан “Каруанһарай” ансамбле сығыштарын айырыуса иғти­бар менән ҡараған. Төркөмдөң үтә популяр сағы. Малай, Рәсүл Ҡара­булатов кеүек ҡурайҙа уйнаясаҡмын, тип хыялланған. Шулай башланған уның йыр-моң донъяһына сәйәхәте. Тәүҙә ҡаланың 1-се, аҙаҡ 9-сы баш­ҡорт гимназияһында уҡыған. Ҡара­булатовҡа оҡшау хыялын алтынсы кластан тормошҡа ашыра башлаған – ҡурайҙа уйнарға өйрәнгән.

“Арғымаҡ”тың тәүге репетицияһы 2009 йылда була. Беренсе концерттарын 2011 йылдың йәйендә “Нефтсе” мәҙәниәт һарайында ҡуялар. Төркөм этно-рок йүнәлешен үҙ итә. Шулай уҡ уларҙың репертуарында регги, диско, кантри, латин көйҙәре, мөнәжәт, фольклор, көнсығыш ритм­дары, африка моңдары, Lounge, Ambient кеүек йәштәр стилендәге йырҙар ҙа бар.

Әлеге осрашыу бик матур үтте. Сараға килгәндәр Ринат Рамаҙа­новтың тарихты, халыҡтың ауыҙ-тел ижадын, бик күп шиғырҙарҙы яҡшы белеүенә һоҡланды. Дингә килеүе лә бик иртә булған икән. Тәүге доғаны өс йәшендә ятлап алған. Ринат киләсәккә ҙур хыялдар менән йәшәй. Бер исем, йәғни бренд аҫтында мәктәп, продюсерлыҡ үҙәге, “Бәләкәй Арғымаҡ” төркөмө асырға ниәтләй. “Ғаиләбеҙҙә әлегә ике бала, өсөнсөһөн көтәбеҙ. Кисен бәлә­кәстәремде “Урал батыр” эпосын уҡып йоҡлатам”, – тине билдәле артист.

Мәҙәни сара аҙағында Ринат Рамаҙанов ҡурайҙа өләсәһе Сәли­мәгә арнап “Сәлимәкәй” көйөн уйнап ишеттерҙе.

Тамашасылар Ринаттан: “Яратам тауыҡ ботон” клибын ҡарағас, уны ҡабул итмәй, телефоныңды ысынлап та мейескә утҡа яҡтыңмы?” – тип һорағас, ул былай тип яуап бирҙе: “Беҙ һуңынан “100lb_official” етәксеһе менән осрашып, был мәсьә­ләне “ирҙәрсә һөйләшеп” хәл иттек”.

Һөйләшеүҙе тамашасылар тура эфирҙа Ә. Вәлиди исемендәге Милли китапхана сайтында, “Ашҡаҙар” ра­диоһының “Бәйләнештә”ге битен­дә ҡарай алды.

- Гөлдәр Яҡшығолова.