"Сулпан"да - яңы премьера

Ошо көндәрҙә Сибай ҡалаһының "Сулпан” балалар театрында  “Самрау батша бүләге” исемле спектаклдең премьераһы булды. Тамашаны тәүгеләрҙән булып Сибай ҡалаһының Рамаҙан Өмөтбаев исемендәге Башҡорт лицейы уҡыусылары ҡараны.

“Урал батыр” эпосына нигеҙләнеп ҡуйылған спектаклдең авторы Динара Ҡәйүмова. Ҡуйыусы режиссер - Мәжит Ғафури исемендәге Башҡорт академия драма театры актеры, Башҡортостандың атҡаҙанған артисы Фирғәт Ғарипов. Әйткәндәй, ул “Сулпан” театры менән икенсегә спектакль сығарған.

Тамаша Марвел донъяһы супергеройҙары һәм батырҙарыбыҙ араһында параллель ҡуйылып, башҡорт батырҙары ла бер кемдән кәм түгел икәнен күрһәтә.
Спектаклдә ҡулланылған махсус эффекттар, костюмдар (рәссамы - Сулпан Азаматова), яңы алымдар, видеоанимациялар (видеографтары - Ләйсән Ғарипова, Фәһим Сөнәғәтов), музыка (композиторы - Вәсил Ғафаров), ҡуйылған бейеүҙәр (хореографы - Александр Родионов) – барыһы ла бер бөтөн булып күренеп, бик йылы ҡабул ителә.

Тамаша өлкәндәргә лә, балаларға ла оҡшаны, бигерәк тә, Урал батыр, Шүлгән, Йүгерек батыр, Тау батырҙы ихлас алҡышланылар.

"Самрау батша бүләге" ысынлап та балалар өсөн ҙур бүләк буласағына ышаныс ҙур.

Фото һәм сығанаҡ: Сибай концерт-театр берекмәһе сайтынан.