“Тамға” еңеүселәре билдәләнде

Башҡорт теле көнөндә Өфөнөң “АРТ-квадрат” майҙанында    II “Тамға” халыҡ-ара башҡорт милли кейеме оҫталары конкурсын ябыу тантанаһы үтте. Быйылғы еңеүселәрҙең исеме билдәләнеп, уларҙы бүләкләү тантанаһы уҙҙы. Билдәле булыуынса, беренсе “Тамға” конкурсы былтыр үткәрелде. Проект традицион милли кейемдең уникаллегенә, этник үҙенсәлектәренә, заманса мода менән ҡатнашлыҡтағы төрлөлөгөнә иғтибарҙы йәлеп итеүгә йүнәлтелгән. Ни өсөн тигәндә, сәхнәлә кейергә тәғәйенләнгән, стилләштерелгән милли кейем боронғо өлгөләрҙе ҡыҫырыҡлай, ә был тарихи кейемдең ни рәүешле булғанын күҙ алдына килтереүҙе торған һайын ҡатмарлаштыра бара.

Башҡорт милли кейеменең уникаллеген, үҙенсәлектәрен һаҡлау һәм өйрәнеүгә республи­кала булдырылған Милли кейем көнө ярайһы булышлыҡ ҡыла баш­ланы. Артабан ошо йүнә­леш­тәге маҡсатлы эштәргә “Там­ға” конкурсы ла юл асты. Ул милли кейем өлгөләрен өйрәнеү һәм тергеҙеү менән шөғөлләнгән оҫ­та­ларҙы тупларға, уларҙа тради­цион башҡорт кейеменә ҡы­ҙыҡ­һыныуҙы арттырырға ярҙам итте.

Конкурста ҡатнашыусыларҙың эштәре биш номинацияла ҡарал­ды: “Башҡорттарҙың милли кейеме – реконструкция”, “Заманса автор костюмы”, “Балалар кейеме”, “Башҡорт милли ювелир би­ҙәүестәре”, “Традицион башҡорт костюмы аксессуарҙары”. Финал­ға сыҡҡандар араһында “Тамашасы һөйөүе” номинацияһында еңеүсе лә билдәләнде – Зөлфиә Насирова. Тауыш биреү конкурс­тың социаль селтәрҙәге сәхифәһендә барҙы.

II “Тамға” конкурсы быйыл сентябрь айында башланғайны. 1-2 ноябрҙә һайлап алыу туры үтте. Баһалама төркөмө ике көн дауа­мында 200-ләп ҡатнашыу­сының эштәрен ҡараны. Конкурсанттар Италиянан, Төркиәнән, Ҡа­ҙағ­с­тан­дан, Мәскәүҙән, Ҡурған, Силә­бе, Ырымбур, Һамар өлкәлә­ренән, Пермь крайынан һәм Башҡортостандан ине.

14 ноябрҙә республиканың Ә.-З. Вәлиди исемендәге Милли китапханаһында конкурс эштәрен яҡлау һәм финал өлөшө үтте. Йомғаҡлау турында 36 талантлы автор ҡатнашты.

Еңеүселәрҙе тәбрикләргә сыҡ­ҡан Республика халыҡ ижады үҙәге директоры Артур Әлибәков билдәләүенсә, үткән йылда стил­ләштерелгән кейемдәр күпсе­лекте тәшкил итһә, быйыл милли кейемдең тарихи өлгөләренә ҡарап тергеҙелгән эштәр күп булған. Айырыуса балалар кейеме өлгөләрен күреү шатлыҡлы булды, тип билдәләне ул.

Үҙенсәлекле конкурста 1-се урынға лайыҡ тип “Балалар кейеме”ндә – Зөлфиә Насирова (Өфө); “Заманса автор костюмы”нда – Роза Юлдашбаева (Өфө); “Башҡорт милли ювелир биҙәүестәре”ндә – Марат Шахаев (Өфө); “Традицион башҡорт костюмы аксессуарҙары”нда – Әлфиә Әхтәриева (Өфө); “Баш­ҡорттарҙың милли кейеме – реконструкция”ла Артур Батыршин менән Айгөл Ғәлиуллина (Өфө) танылды. Бынан тыш, әлбиттә, 2-се һәм 3-сө урындар ҙа үҙ еңеүселәрен тапты. Призлы урын­дар эйәләре дипломдар һәм аҡсалата сертификаттар менән бүләкләнде. Конкурстан тыш, башҡорт милли кейемен һаҡлау, популярлаштырыуға индергән өлөштәре өсөн ҡайһы бер оҫта­ларға махсус приздар ҙа тапшырылды.

Йомғаҡлау кисәһенең икенсе өлөшөндә сағыу тамаша – баш­ҡорт милли кейеме оҫталарының халыҡ кейеменең төрлөлөгөн, ғә­жәйеп матурлығын асҡан коллекцияларын күрһәтеү ойошторол­до. Популяр башҡарыусы Зилиә Бәх­тие­ваның “Мин башҡортса һөй­ләшәм” йырына төшөрөлгән клип та барыһының да күңеленә хуш килде.

Проект “Башҡортостан Рес­публи­каһында Рәсәй милләте берлеген нығытыу һәм халыҡ­тарҙың этно-мәҙәни үҫеше” дәүләт программаһы булыш­лығында тормошҡа ашырыла.

Рәүилә ҒАТАУЛЛИНА.