Зәйнетдин Яңы йылды еңеү менән башланы

“Рәсәй мәҙәниәт үҙәге” йәш ижади тәҡдимдәрҙе хуплау үҙәге “Көслөрәк” музыка конкурсы ойошторҙо. Унда Башҡортостандың атҡаҙанған артисы Заһир Зәйнетдинов – Зәйнетдин дә ҡатнашып, “Халыҡ тауышы” номинацияһында еңеүгә өлгәште. Уның өсөн сарала ҡатнашыусыларҙың 63,44 проценты тауыш биргән.

– “Көслөрәк” музыка конкурсында ҡатнашып еңдек.  “Рус Медиатөркөмө” продюссер үҙәгенән үҙебеҙҙең ижадты үҫтереү буйынса бүләк алдыҡ. Бүләкләү тантанаһында үҙемә генә ҡатнашырға тура килде. “Атым бар” йырын һәм клибын төшөрөүҙә ҡатнашҡан ҙур командама рәхмәт белдерәм. Барлыҡ тауыш биреүселәргә рәхмәт! Еңеү - беҙҙә! – тип шатлығы менән уртаҡлашты Зәйнетдин.  

Конкурста Зәйнетдин – “Атым бар”, Quintfо́lium Виктория Белова, Анастасия Рычёва – “Грешный человечек”, Василиса Забияко – “Танец солнца”, Умсуура Варламова “Мохсо5оллор” йыры менән ҡатнашҡан.

Башҡорт йырының Рәсәй кимәлендәге конкурста еңеүгә өлгәшеүе, әлбиттә, ҙур мәртәбә. Афарин!

Фото һәм яҙма Зәйнетдиндең социаль селтәрҙәге диуарынан алынды.