Ғалим. Профессор. Йәмәғәт эшмәкәре. Филология фәндәре докторы, Башҡортостан Фәндәр академияһының мөхбир ағзаһы, абруйлы ғалим, күпме тиҫтә быуын студенттарҙың яратҡан остазы, юғары рухлы һәм мәҙәниәтле шәхес Ғиниәтулла Сафиулла улы Ҡунафин. Ә мин ошо титулдарға “Уҡытыусыларҙың уҡытыусыһы” тигән маҡтаулы, хатта бөйөк исемде лә өҫтәр инем.
Рәхмәтебеҙ сикһеҙ
Эйе, бөгөн уның уҡыусылары Башҡортостанда һәм күрше өлкәләрҙә генә түгел, ә бөтә Рәсәйҙә, хатта сит илдәрҙә лә йәшәй һәм ең һыҙғанып эшләй, ҙур хеҙмәт уңыштарына өлгәшә. Был бер ҙә арттырыу түгел: БДУ-ны тамамлаған һәм бөгөн АҠШ-та, Чехияла, Берләшкән Ғәрәп Әмирлектәрендә, Италияла йәшәгәндәре менән мин дә элемтә тотам.
Ғиниәтулла Ҡунафинды фән донъяһы вәкилдәре, вуз студенттары ғына түгел, мәктәп уҡыусылары ла яҡшы белә. Уның уҡыусылары күренекле ғалимдар ғына түгел, маҡтаулы мәктәп уҡытыусылары ла! XIX быуат мәғрифәтселәренең тормошон һәм ижадын төплө өйрәнеп, киң йәмәғәтселеккә еткереү өҫтөнә ул үҙе лә “Башҡортостан Республикаһының атҡаҙанған мәғариф хеҙмәткәре” тигән маҡтаулы исемгә лайыҡ булған һәм уны тулыһынса аҡлаған шәхес.
Ғалим мәктәптәр, уҡытыусылар һәм уҡыусылар менән бәйләнеште өҙмәй. Нисек, тиһегеҙме? Беренсенән, ул – дәреслектәр авторы. Икенсенән, республикала башҡорт теле һәм әҙәбиәте буйынса уҙғарылған төбәк-ара олимпиадаларҙың алыштырғыһыҙ баһалама ағзаһы. Өсөнсөнән, уҡыусылар өсөн ойошторолған фәнни-ғәмәли конференцияларҙа ла, “Урал батыр” эпосын яттан һөйләүсе йәш сәсәндәр бәйгеләрендә лә Ғиниәтулла Сафиулла улын осратабыҙ.
Ә йыл да ойошторолоп, уңышлы үтеп килгән “Йыл уҡытыусыһы”, “Башҡорт теле һәм әҙәбиәте йыл уҡытыусыһы” конкурстарын Ғиниәтулла Ҡунафиндан башҡа күҙ алдына килтереп тә булмай! Ул баһалама рәйесе йәки ағзаһы ғына түгел, ә иң әүҙем һорау биреүсе лә, бәйгесенең хатаһын күрә һалып, төҙәтеп, уны тейешле йүнәлешкә бороп ебәреүсе лә, аҡыллы кәңәшсе лә, аңлашылмаусанлыҡтар килеп сыҡҡанда, тиҙ генә уйынға бороп, йәтеш кенә юмор ҡулланып, уҡытыусыны ауыр хәлдән тартып алыусы ла! Мәҫәлән, сығыш яһаусы онотолоп, артыҡ мауығып китһә, ваҡыты үтә башлаһа, ҡайһы бер баһалама ағзалары кеүек, ҡырҡа ғына туҡтатып ҡуймай, ә ҡулындағы ручкаһын башы өҫтөнә күтәрә лә түңәрәк яһай, йәнәһе, “регламент бөттө, түңәрәкләй башлағыҙ, йомғаҡлағыҙ…” Ә үҙе йылмайып ултыра! Бына шундай ябай ғына күренеш, ә күпме ихласлыҡ, ябайлыҡ, ярҙамсыллыҡ! Ошо мәртәбәле бәйгелә ҡатнашып, ҙур һынауҙар аша үткән, үҙҙәренә күпме тәжрибә туплаған уҡытыусыларҙың Ғиниәтулла Сафиулла улына рәхмәте сикһеҙ.
Абруйлы ғалимдың: “Кешемен тигән кешегә бөтә яҡшы нәмә – рухи көс, илһам тыуған еренән, атай йортонан, мәктәптән һәм китаптан килә”, – тигән һүҙҙәрен дә уҡыусылар яҡшы белә. Уның “Сәйетбаба – изге төйәк”, “Изге лә ул, нурлы ла” тигән китаптары мәктәп уға ни тиклем мөһим, ҡәҙерле һәм яҡын булыуы тураһында һөйләй.
Эйе, уҡыусылар өсөн дәреслектәрҙе һәр ғалим да яҙа алмай. Уның өсөн ғилем генә етмәйҙер ул, мәктәпте, уҡыусыларҙы белеү һәм яратыу, балалар психологияһын аңлау кәрәктер, минеңсә. Миҫал өсөн: “Башҡорт әҙәбиәте. Уҡытыу туған (башҡорт) телендә алып барылған дөйөм белем биреү ойошмаларының 9-сы класы өсөн дәреслек”. Авторҙары: Ғ.С. Ҡунафин, М.Х. Иҙелбаев. 3-сө баҫма. Башҡортостан Республикаһы Мәғариф һәм фән министрлығы тарафынан раҫланды. Өфө, Китап, 2020. 296 бит.
Барыбыҙға ла билдәле: 9-сы класс материалы уҡыусылар өсөн иң ҡатмарлыһы, сөнки әҙәбиәт эҙмә-эҙлекле тарихи-эстетик процесс рәүешендә өйрәнелә. Халыҡ ижады һәм ауыҙ-тел әҙәбиәте, Башҡортостанда боронғо һәм урта быуаттарҙағы ҡулъяҙма әҙәбиәт, XIX быуат башҡорт яҙма һәм баҫма әҙәбиәте, XX быуат башы башҡорт әҙәбиәте. Дөйөм төрки телдә яҙылған әҫәрҙәр балаларға ауыр бирелә, ләкин авторҙар тарафынан бик ентекле, аңлайышлы телдә анализдар, аңлатмалар, әҫәрҙәрҙең ҡыҫҡаса йөкмәткеһе йәки сюжеты тәҡдим ителә, һүҙлек эштәре лә күҙ уңынан ысҡындырылмай. Үҙаллы һәм өйгә эштәр уҡыусыларҙың йәш үҙенсәлектәрен иҫәпкә алып төҙөлгән.
Легендалар йөрөй...
Башҡортостандың XIX һәм XX быуат башы мәҙәниәте һәм әҙәбиәтенең торошо, үҫеше ентекле тикшерелгән. Ш. Зәки, Ә. Ҡарағош, Һ. Сәлихов, М. Ҡотош-Ҡыпсаҡи, С. Күкләшев, Аҡмулла, М. Биксурин, М. Өмөтбаев, Р. Фәхретдин, М. Ғафури, Ш. Бабич кеүек бөйөк шағирҙарҙың, сәсәндәрҙең, ғалим-яҙыусыларҙың тормош юлдары һәм ижадтары хаҡында яҙылған бүлектәрҙең ҡиммәте бигерәк тә ҙур.
“Һуңғы һартай” – тетрәндергес әҫәр. Был мәшһүр ҡомартҡыбыҙ менән таныштырған дәреслек авторына уҡыусыларыбыҙҙың рәхмәте ҙур. Балалар “Ҡисса-и Йософ”то, ”Хөсрәү вә Ширин”де, “Ҡуҙыйкүрпәс менән Маянһылыу”ҙы яратып өйрәнә. “Таһир менән Зөһрә”нең йөкмәткеһе лә ҡыҙыҡһындыра уларҙы, сөнки һәр класта тиерлек Таһир һәм Зөһрә исемле ҡыҙ-малайҙар ултыра (мәслихәт: һуңғы йылдарҙа халҡыбыҙ саф башҡорт исемдәренә өҫтөнлөк бирә). Әлбиттә, уҡытыусы үҙе белгән тиклемен уҡыусыларға еткерә, ләкин был үлемһеҙ әҫәрҙең дә сюжеты дәреслектә бирелһә, бигерәк тә яҡшы булыр ине.
М. Өмөтбаевтың әҙәби, тәржемә, педагогик, фәлсәфәүи һәм тарихи эшмәкәрлеген һөйләгән мәҡәләләр – дәреслектәге иң уңышлы, ҡыҙыҡлы бүлектәрҙең береһе. Ғ.С. Ҡунафин тарафынан яҙыусы-ғалимдың бығаса ҡулъяҙма хәлендә һаҡланған ғилми хеҙмәттәрен, публицистик мәҡәләләрен, әҙәби әҫәрҙәрен, тәржемәләрен, хаттарын киң файҙаланып, архивтарҙа, ғилми экспедицияларҙа табылған яҙмалар араһынан, ваҡытлы матбуғат биттәренән йыйып тупланып, үҙенең баш һүҙе һәм аңлатмалар менән сығарылған “Йәдкәр” китабы халҡыбыҙ өсөн ысын йәдкәр булды. Автор мәшһүр ғалимыбыҙҙы Милләт атаһы дәрәжәһенә күтәрә. “Башҡорт Карамзины” булып хәтерендә ҡала балаларҙың.
Дәреслектең М. Аҡмулла, М. Ғафури, Ш. Бабичҡа арналған бүлектәре лә бөйөк шәхестәребеҙҙең тормош юлын һәм ижадын тулы сағылдыра. Ғ. Ҡунафиндың ”Аҡмулланың шиғри йәйғоро”, (2011), ”Ш. Бабичтың ижад офоҡтары” (2015) тигән хеҙмәттәре уҡыусылар тарафынан иншалар яҙғанда, фәнни-тикшеренеү эштәре башҡарғанда киң файҙаланыла.
Ҡыҫҡаһы, “Башҡорт әҙәбиәте” дәреслегенең дә, хрестоматияның да яңы баҫмаһы йөкмәткеһе яғынан бай, биҙәлеше сифатлы булыуы менән уңышлы, ул мәктәп уҡытыусыларын да, уҡыусыларҙы ла берҙәй ҡәнәғәтләндерә.
Профессор Тимерғәле Килмөхәмәтовтың: “Юғары уҡыу йорто хеҙмәткәре үҙен өс юҫыҡта күрһәтергә тейеш: педагог-ойоштороусы, ғалим һәм тәрбиәсе булараҡ. Ғ.С. Ҡунафин юғары кимәлдә ошо сифаттарға эйә… Тағы ла уның йомартлығы һәм талапсанлығы тураһында легендалар йөрөй”, – тигән һүҙҙәре менән килешмәйенсә мөмкин түгел. Фәнгә лә, мәғариф өлкәһенә лә ҙур өлөш индергән күренекле шәхес ул.
Ғалим да, тәрбиәсе лә
Ғиниәтулла Сафиулла улы Ҡунафинды “Уҡытыусыларҙың уҡытыусыһы” тип билдәләүҙең тағы бер сәбәбе – уның “Башҡортостан уҡытыусыһы” журналында даими баҫылып барған методик, аналитик мәҡәләләренең булыуы. Беҙ уларҙы көтөп алабыҙ, көндәлек эшебеҙҙә файҙаланабыҙ, кәңәштәрен тотабыҙ. Был – Т.Ә. Килмөхәмәтов ағайҙың “вуз хеҙмәткәре тәрбиәсе лә булырға тейеш” тигән һүҙҙәренә тағы бер ҡеүәт. Әҙәбиәтебеҙҙең революцияға тиклемге осорон ентекле өйрәнеү менән генә сикләнмәйенсә, ғалим бөгөнгө әҙәби әҫәрҙәргә лә бик иғтибарлы, уларға үҙ мөнәсәбәтен белдереп, үҙ баһаһын биреп бара. Ваҡытлы матбуғат биттәрендә баҫылған хеҙмәттәре шуны иҫбатлай.
Ғ.С. Ҡунафинды Ғайса Хөсәйеновтың шәкерте тип тә атайҙар. Бөгөн оло ғалим үҙенең барлыҡ остаздарының ышанысын аҡлауы менән дә бәхетле. “Әхнәф Харисов, Ким Әхмәтйәнов, Ғилемдар Рамазанов, Әнүр Вахитов, Вафа Әхмәҙиев, Ғайса Хөсәйенов ғилем донъяһына төплө һәм өмөтлө ғалим килеүенә ышана. Аспирант Өфө, Стәрлетамаҡ, Ҡазан, Ырымбур, Мәскәү, Ленинград (Санкт-Петербург) ҡалаларының архивтарында эҙләнә, экспедицияларға йөрөй. М. Өмөтбаевтың “Башҡорттар” исемле очеркын табып алып ҡайтып, матбуғатта баҫтырыуы әҙәбиәт һәм фән донъяһында ҙур ваҡиға булды”, – тип яҙа филология фәндәре докторы, профессор Г.Н. Гәрәева. Ошо дәрте, көсө, егәрлелеге ташламаһын уҡытыусыбыҙҙы.
Ғиниәтулла Сафиулла улының күренекле йәмәғәт эшмәкәре, әүҙем йәмәғәтсе булыуы барыбыҙға ла билдәле: Бөтә донъя башҡорттары ҡоролтайы Башҡарма комитеты ағзаһы, Яҙыусылар союзы идараһының тәнҡит бүлегендә эшләү, төрлө комиссияларҙа, бәйгеләрҙә ҡатнашыу… Хөрмәтле ғалимдың шуларҙың барыһына ла ваҡыт табыуы ҡыуаныслы.
700-ҙән артыҡ ғилми хеҙмәт, монография, дәреслек һәм уҡыу әсбаптары авторы, профессор Ғ.С. Ҡунафин фәнни, педагогик һәм йәмәғәтселек эшмәкәрлеге өсөн “Салауат Юлаев” орденына, “Башҡортостандың атҡаҙанған фән эшмәкәре”, “Рәсәй Федерацияһының почетлы юғары һөнәри белем биреү хеҙмәткәре”, “Башҡортостандың атҡаҙанған мәғариф хеҙмәткәре” тигән маҡтаулы исемдәргә, М. Өмөтбаев, М. Ғафури, Ж. Кейекбаев исемендәге премияларға, бик күп төрлө билдәләргә, Маҡтау ҡағыҙҙарына, стипендияларға лайыҡ булды.
Ғиниәтулла Сафиулла улы Ҡунафин әле лә фән донъяһында ең һыҙғанып хеҙмәт итә, студенттарына белем ҡанаттары ҡуйып, тормош йыһанына осора, йәмәғәт эштәрендә ҡайнай. Абруйлы ғалим, педагог, йәмәғәт эшмәкәре, уҡытыусыларҙың уҡытыусыһына ныҡлы сәләмәтлек, яңы фәнни асыштар, хәҙергеләй егәрлелек һәм талапсанлыҡ, ғаилә именлеге теләйбеҙ.
Зилә ПСӘНЧИНА,
Мораҡ башҡорт гимназияһы уҡытыусыһы.
Күгәрсен районы.