"Ҡомартҡы" сауаплы эш башҡара

Мәсетлелә халыҡ ижадын һаҡлауға һәм таратыуға ҙур иғтибар бирелеүе Яңы Мишәр ауылында «Айыҡ ауыл» республика конкурсы сиктәрендә Рәсәй халыҡтарының мәҙәни мираҫы йылына, Башҡорт мәҙәниәте һәм рухи мираҫы йылына арналған “Милли оҫтахана” фестивален ойоштороуҙа ла күренде. 

“Биҙәктәрҙә – халыҡ хәтере” саҡырыуы аҫтында "Ҡомартҡы" халыҡ коллективы ағзалары башҡорт мәҙәниәтен һәм туған телде һаҡлау буйынса ҙур эш алып бара. Бөйөк ҡомартҡыларҙы киләсәк быуынға тапшырыу өҫтөндә күп саралар үткәрә улар. Шул рәүешле башҡорт милләтен һаҡлауға ҙур өлөш индерәләр, балаларын туған телгә һәм ғөрөф-ғәҙәттәргә өйрәтәләр, милләттең киләсәге хаҡында хәстәрлек күрәләр.

Яңы Мишәр ауылының “Умырзая” балалар баҡсаһында ла туған телде һаҡлау буйынса оло эш башҡарыла. Бында балаларҙа башҡорт халҡының әҙәбиәтенә, мәҙәниәтенә, тарихына ҡыҙыҡһыныу уятып ҡына ҡалмайҙар, ә барлыҡ сараларҙы башҡорт телендә ойошторалар. Милли халыҡ байрамдарына, йолаларға ҙур әһәмиәт бирелә, балалар ғорурланып башҡорт телендә аралаша.

Бына шундай изге эштәр аша мәсетлеләр ғөрөф-ғәҙәттәрен һаҡлай, киләсәк быуынға еткерә, тарата.

Фото: Мәсетле районы башҡорттары ҡоролтайы.