Мәҙәни мираҫыбыҙ ифрат бай

“Ҡунаҡтар минән Өфөлә тәү сиратта ҡайҙа барырға була икәнлеген һораһалар, мин йыш ҡына: “Опера һәм балет театрына”, - тип яуап бирәм. Тап бында балет артисы Рудольф Нуриев, опера басы Илдар Абдразаҡов үҙ юлын башлаған. Уның данлыҡлы ҡустыһы Асҡар Абдразаҡов театрҙың художество етәксеһе булып китте, ә репертуарҙа билдәле хореограф Юрий Григоровичтың постановкалары ҙур урын биләй.

Республикабыҙҙың мәҙәни мираҫы бик бай. Йөҙләгән исем араһында яҙыусылар Сергей Аксаков һәм Сергей Довлатов, рәссамдар Михаил Нестеров һәм Александр Тюлькин, шағирҙар Мостай Кәрим менән Мәжит Ғафури, скрипкасы һәм дирижер Владимир Спиваков,  ДДТ төркөмө, йырсы Земфира һәм әллә күпме йәш таланттарыбыҙҙы билдәләргә була. Өҫтәүенә иҫ киткес шәп театрҙарыбыҙ, музейҙарыбыҙ, музыкаль, шул иҫәптән халыҡ коллективтарыбыҙ бихисап.

Беҙҙең тыуған еребеҙҙә төрлө халыҡтарҙың быуаттар дауамында һаҡланған йолалары ҡәҙерләп быуындан-быуынға тапшырылып ҡына ҡалмай, ә яңы төҫ алып ҡушыла – тап шуның өсөн Башҡортостаныбыҙ данлыҡлы мәҙәниәт хеҙмәткәрҙәренә байҙыр тип уйлайым. Һәр халыҡтың тарихына, ҡиммәттәренә хөрмәтле ҡараш – беҙҙең мәҙәни кодыбыҙ.

Былтыр беҙҙең республика төбәктәр араһында беренсе булып Бөтә донъя фольклориадаһын ҡабул итте, өфөләр генә түгел, райондар халҡы ла донъя таланттарын күрҙе. Беҙҙә II “АРТ-Ҡоролтай” мәҙәни форумы ойошторолдо. Унда һөнәрмәндәр ижади эксперименттары, иң яҡшы тәжрибәләре менән уртаҡлашты, мәҙәниәт өлкәһендәге мәсьәләләрҙе тикшерҙе.

Шуны билдәләгем килә, былтырғы һөҙөмтәләр буйынса, республикала мәҙәни сараларҙа 75 миллион кеше булған. Был күрһәткес буйынса беҙ Волга буйы федераль округында бишенсе урындабыҙ. Һәм был тап мәҙәниәт хеҙмәткәрҙәренең ҡаҙанышы.

Хеҙмәтегеҙ һәм илһам өсөн һеҙгә ҙур рәхмәт! Тағы ла байрам менән! Иҫән-һау булығыҙ!”, - тип яҙҙы БР Премьер-министры Андрей Назаров.