“Уның һәр йыры хитҡа әйләнә...”

“Рәсәй 1” телеканалында Андрей Малаховтың  “Күңелдән сыҡҡан йырҙар” тапшырыуының сираттағы сығышында Өфөнән 35 йәшлек Эдуард Хөснөтдинов ҡатнашты. “Был ҡунағыбыҙ – Өфөнән. Уның һәр йыры хитҡа әйләнә, һәм бөгөн унан интернетта 70 миллион кеше тыңлаған йырын башҡарыуҙы һораныҡ”, - тип таныштырған Андрей Малахов яҡташыбыҙ менән.

Башта Эдуард - үҙе яҙған  “Күңелем йылына” тигән йырын, артабан башҡорт телендә Башҡортостандың атҡаҙанған артисы, Өфөнөң почетлы гражданы һәм башҡа маҡтаулы исем-дәрәжәләргә эйә Рим Хәсәновтың күптәребеҙ яратып тыңлаған  “Ҡышҡы романс” әҫәрен башҡарған. “Беренсе тапҡыр федераль каналда булдым, тик ыңғай тәьҫораттар алдым. Яңы тәжрибә, яңы танышыуҙар – быларҙың бөтәһе лә яҡшы. Барыһы ла тиҙ генә үтте, әлбиттә, эфир ваҡытында бер аҙ тулҡынландым”, - тип белдергән Эдуард Хөснөтдинов “Башинформ” мәғлүмәт агентлығы журналисы Ләйлә Аралбаеваға.

Фото, видео: “Башинформ”.