Башҡортостан
-13 °С
Болотло
VKOKРУС
Бөтә яңылыҡтар

Бында икән мөғжизәләр иле...

Ауырғазы үҙәк китапханаһында заманса уңайлыҡтар тыуҙырылған.

“Китапханалар ҙа бөгөнгө заман талаптарына яуап биргән хеҙмәт күрһәтергә тейеш. Шул саҡта беҙҙән халыҡ өҙөлмәйәсәк. Эшебеҙҙә тап ошоға ынтылабыҙ”,  – ти Ауырғазы районының Үҙәкләштерелгән китапханалар системаһы директоры Айгөл Ғәзиева.

Ғәлимйән Ибраһимов исе­мендәге үҙәк район китапха­наһына килгән һәр кемде ошо төбәктә тыуып үҫкән яҙыусы­ларҙың портреттары эленгән галерея ҡаршылай. Эйе, бил­дә­ле шәхестәргә бай Ауырғазы районы. Даһи шағир Рәшит Назаров үҙе генә ни тора! Әммә әҙәбиәт менән ҡыҙыҡһынған яңы быуын барлыҡҡа килһен өсөн уларға мөмкинлектәр ҙә булдырырға кәрәк. Был йә­һәттән Ауырғазыла барыһы ла яйлы – китапханасыларҙың башҡарған эштәре тап ошоно раҫлай.

Ысынлап та, гранттар ярҙа­мында төрлө проекттарҙы тормошҡа ашырыу үҙәк район китапханаһына йөрөгән халыҡ­тың бермә-бер артыуына  кил­тергән.  “Элекке етәксебеҙ Замира Хөсәйенова башланғысы менән һаулығы буйынса мөм­кин­лектәре сикләнгән балалар өсөн “Табип китап” үҙәге эшләй башлағайны. Беҙ ошо эште дауам итергә булдыҡ һәм Президент гранттары фонды конкурсында еңеү яулап, “Мөғ­жизәләр иле” проектын тор­мошҡа ашырабыҙ”, – тип тө­шөн­дөрҙө Айгөл Фәнзил ҡыҙы. Мәҫәлән, был сара сиктәрендә китапханаға үҙенсәлекле интерактив ҡомлоҡ, Айболит һыны, айыу менән бүре костюмы алып ҡуйғандар. Хәҙер улар ярҙамында бәләкәстәр өсөн даими рәүештә төрлө уйындар, оҫталыҡ дәрестәре үткәрелә, китапхананың ҡурсаҡ театры­ның тамашалары күрһәтелә икән. Һаулығы буйынса мөм­кин­лектәре сикләнгән бала­ларға уңайлыҡ тыуҙырыу өсөн коляска ла һатып алынған. Әлбиттә, урындағы ата-әсәләр бындай үҙгәрештәргә шатланып бөтә алмай.

Китапханасылар фекерен­сә, оло быуындың китапҡа ихтирамы ҙур, шуға бында иң тәүҙә үҫмерҙәрҙе һәм йәштәрҙе йәлеп итеү мөһим. Был йәһәт­тән дә байтаҡ эштәр башҡа­рыла – мәҫәлән, Мәҙәни башланғыстар буйынса Президент фонды грантына “Уңыш залы” проекты тормошҡа ашы­рылған. Уның сиктәрендә ки­тапханаға интерактив таҡта ҡуйылған һәм бик сағыу саралар ойошторолған – талантлы йәштәр ҡатнаш­лығында ижади осрашыуҙар, презентациялар, күргәҙмәләр үткән. Үҫмерҙәр өсөн бөтә уңайлыҡтары булған махсус уҡыу залы барлыҡҡа килгән – унда район хакимиәте тарафынан бүленгән аҡсаға заманса йыһаздар һатып алынған. 

“Бөгөн беҙ Ғәлимйән Ибра­һимов, Рәшит Назаров, Салауат Рәхмәтулла, Әлфиә Әсә­ҙул­лина, Флүзә Мырҙабаева, Салауат Әсфәтуллин, Александр Савельев-Сас кеүек талантлы әҙиптәребеҙ менән хаҡлы рәүештә ғорурланабыҙ. Әйткәндәй, Александр Савельев-Сас башҡортса ла бик матур итеп һөйләште, бик күп әҫәр­ҙәрен сыуашсанан үҙе тәржемә итә ине. Шуныһы ҡыуаныс: уларға алмашҡа үҫеп килгән быуын бар – Данила Андреев, Дмитрий Емелин, Айгизә Йосопова, Юлиана Ғиндуллина, Иншар Вәлитов”, – тиҙәр бында.

Эйе, уңыштары байтаҡ Ауырғазы китапхана­сылары­ның. Бөгөн район китапханаларында 37 кеше мәшғүл һәм уларҙың заман мөмкинлек­тәрен оҫта файҙаланыуы, үҙ эшен яратып башҡарыуы  ошондай һөҙөмтәләрҙең төп сере булып тора ла инде.

 

Рәшит ЗӘЙНУЛЛИН.

Ауырғазы районы.

Читайте нас в