Бөтә яңылыҡтар

Алға, “Башҡортостан”!

Гәзит мәңгелек ҡиммәттәрҙе быуындан-быуынға еткерә.

...Бынан бер нисә йыл элек, “Башҡортостан” гәзитенең баш мөхәррире вазифаһын башҡарған осорҙа, билдәле шағир, журналист, эшҡыуар Азамат Юлдашбаев, баҫмабыҙҙың яҙмышы хаҡында фекер йөрөтөп:     “Тотош Йыһанда башҡорт телендә сыҡҡан төп баҫма берәү генә, ул да булһа – “Башҡортостан”, – тигәйне.

Ни тиклем юғары яңғырамаһын, был һүҙҙәрҙә ябай хәҡиҡәт ярылып ятыу менән бер рәттән, гәзит хеҙмәткәрҙәре иңенә йөкмәтелгән оло бурыс та төҫмөрләнә: төп баҫмала фәҡәт үҙ эшен мөкиббән яратҡан һәм белгән, республика матбуғатында эшләгән башҡа хеҙмәттәштәренә һөнәри йәһәттән өлгө булған яуаплы, маҡсатлы, етеҙ кешеләр генә эшләй ала.

Ә заман журналистары өлөшөнә төшкән бурыстар иҫ киткес мөһим, киң һәм күп яҡлы. Әлбиттә, тәүге сиратта гәзиттең йөкмәткеһен байытыу, халҡыбыҙҙы борсоған киҫ­кен мәсьәләләрҙе яҡтыртыу, улар­ҙы власть даирәләренә ет­кереү, баҫманың публицистик ҡеүәһен көсәйтеү кеүек йүнәлештәр тәүмаҡ­сат булып тора. Шул уҡ ваҡытта көндәлек яңылыҡтарҙы гәзит уҡыусыларға ваҡытында һәм аныҡ еткереү, заман саҡырыу­ҙарына сифатлы мәғлүмәти яуап бирә белеү ҙә – төп бурыстарҙың береһе.

Һуңғы бер нисә йылда иһә Интернеттағы социаль селтәрҙәрҙә гәзиттең төркөмдәре барлыҡҡа килде. Тәүлек әйләнәһенә тиерлек эш­ләгән был ҡеүәтле ресурста рәсми мәғлүмәттәрҙән башлап, көндәлек киҫкен мәсьәләләрҙе күтәргән, йәмғиәттәге теге йәки был мөһим ваҡиғаларҙы яҡтыртҡан, күңел йыуанысы биргән, милли рухыбыҙҙы сағылдырған төрлө яҙмалар баҫыла килә.

Әйтергә кәрәк, гәзит биттәрендә һәм уның социаль селтәрҙәге төр­кө­мөндә баҫылған яҙмаларҙың йөкмәткеһе йыш ҡына бер-бере­һенән айырыла: һәр медиамай­ҙандың үҙ йүнәлеше, үҙ аудито­рияһы бар. Ошондай һандарға туҡталып үтәйек: бөгөн “Баш­ҡортостан” гәзите дүрт мең дананан ашыу тираж менән таратылһа, социаль селтәрҙәге төркөмдө йөҙ меңдән ашыу кеше уҡый.

2018 йылдан “Башҡортостан” гәзитенә билдәле педагог, тәжрибә­ле журналист, күренекле матбуғат һәм йәмәғәт эшмәкәре Вәдүт Ғәйфулла улы Исхаҡов етәкселек итә. Шулай уҡ ул – 2020 йылдың декабренән Башҡортостан Респуб­ликаһы Журналистар союзы рәйесе лә. Уның урынбаҫарҙары – билдәле журналистика ветерандары, ҡәләм оҫталары Миңзифа Илтенбаева, Гөлдәр Биргәнова-Бүләкбаева, Алһыу Әһлиуллина, Рәшит Зәйнул­лин – йылдар дауамында беҙҙең гәзит менән бергә үҫкән, камил­лашҡан ижадсылар; ойоштороу, коллективты бергә туплау кеүек яуаплы эште атҡарған белгестәр.

Был исемлектән иң тәжрибәле һәм оҙаҡ йылдар дауамында редакцияла эшләгән Миңзифа Абрар ҡыҙы Илтенбаеваны айырыуса билдәләп үтке килә. Бынан дүрт тиҫтә йыл самаһы элек Башҡорт дәүләт университетын тамамлап килгән йәш белгес хеҙмәт юлын ябай хәбәрсе булып башлаған, тәржемәсе лә, корректор ҙа булған, журналист оҫталығын төрлө ижади бүлектәрҙә камиллаштырған, ә һуңғы ике тиҫтә йылда ул – баҫма­ның яуаплы секретары вазифа­һында. Миңзифа Абрар ҡыҙы – иҫ киткес талапсан, төплө белемле, һүҙ баһаһын һәм ҡеүәтен һөнәри йәһәттән нескә тойған белгес һәм оҫта ойоштороусы ла: ташҡа баҫы­лаһы һәр яҙма тәүге сиратта уның тәжрибәле ҡулынан үтә, тап уның ярҙамында камиллаша һәм аныҡ сүрәттә гәзит уҡыусыға барып етә.

Ғөмүмән, гәзиттең стилен, йү­нәлешен, йөҙөн билдәләгән тото­роҡло журналистар берлеге күптән тупланған “Башҡортос­тан”да: Динә Арыҫланова, Гөлдәр Яҡшығолова, Гүзәлиә Балтабаева, Илдар Аҡъюлов, Лилиә Нуретдинова, Әлфиә Минғәлиева, Рәмилә Мусина, Дилбәр Ишморатова, Айһы­лыу Низамова, Тәнзилә Дәү­ләтбирҙина, Рәүилә Ғатауллина, Римма Солтанова, Рәмил Мансуров, Кәримә Усманова, Резеда Шәңгәрәева – уларҙың һәммәһенең исеме гәзит уҡыусыларға яҡшы таныш, һәммәһенең үҙ уҡыусыһы, фекерҙәше бар республикала.

“Башҡортостан” журналистарын башҡаларҙан айырған тағы бер мөһим төшөнсә – ул да булһа универсаллек. Телгә алған һәр ҡәләм оҫтаһы, заман талаптарына ярашлы, үткер фекерле әңгәмәсе лә, бәләкәй генә мәғлүмәттән алып төплө мәҡәлә яҙған журналист та, рус һәм башҡорт теле үҙенсә­лек­тәрен белгән тәржемәсе лә. Әйт­кән­дәй, баҫма битендә донъя күргән барлыҡ рәсми материал­дарҙы юғары оҫталыҡ менән тәр­жемә иткән Лилиә Дәүләтбәкованы ла билдәләп үтеү зарур. Тап ул баҫмабыҙҙың рәсми йөҙөн билдә­ләй, республикалағы иң тәжрибәле тәржемәселәрҙең береһе, тигән лайыҡлы даны бар.

Ғөмүмән, гәзит сығарыу – коллектив хеҙмәт. Журналистарҙың яҙмаларынан тыш, редакцияға төр­лө проблемаларҙы сағылдыр­ған, шатлыҡ-ҡыуаныстар килтергән төрлө темаларҙағы хаттар ҙа йыш килә. Уларҙы ла эшкәртеп, төҙәтеп, мөхәррирләп гәзит уҡыусыға етке­рәһе бар. Был йәһәттән, журналис­тарға текст йыйыу оҫталары Сажи­ҙә Ғилметдинова һәм Миңһылыу Сәлимгәрәева һәр саҡ ярҙамға килергә әҙер.

Баҫманың техник йөҙөн билдә­ләгән белгестәр иһә компьютерҙа нәшерләү бүлегендә эшләй: инже­нерҙар Ирек Ғәлиев, Азат Заһитов, Рисәлә Йомағолова – тиҫтәләрсә йыл гәзитте гәзит итеп формалаш­тырған, версткалау серҙәрен бар нескәлегенә тиклем белгән һөнәр оҫталары. Корректорҙар Зөлфиә Сәғитова, Әҡлимә Ғиззәтуллина, Ми­ләүшә Сайтакова ла – баҫ­мабыҙҙа күптән эшләгән, эштең бар үҙенсәлектәрен белгән, грамоталы белгестәр.

“Реклама һәм баҫмаға яҙылыу” бүлеге белгестәре Гөлсимә Сәли­хова, Гөлсирә Сәхиева редак­цияның матди бөтөнлөгө, баҫмаға яҙылыуҙы ойоштороу өсөн яуап бирә. Улар ҙа – гәзитебеҙҙә оҙаҡ йылдар эшләгән һөнәр оҫталары, заман талаптары менән бергә атлаған белгестәр.

Ғөмүмән, гәзит сығарыу – коллектив хеҙмәт, бер туҡтауһыҙ ха­лыҡ мәнфәғәте өсөн эшләгән тын­ғыһыҙ конвейер ул. Ҙур һәм татыу коллективтың нигеҙен тәжрибәле, тос фекерле, етеҙ булмышлы, ос­ҡор ҡәләмле журналис­тар, белгес­тәр билдәләй икән, тимәк, респуб­ликаның башҡорт телендә сыҡҡан төп баҫмаһының яҙмышы өсөн бор­со­лорға урын юҡ: илебеҙҙә нин­дәй генә сәйәси-ижтимағи үҙгәреш­тәр булмаһын, үҙәк һәм республика баҫмалары араһында етди дәғүә­селек шарттары тыума­һын, барлыҡ ауырлыҡтарҙы еңеп сығырбыҙ, тотош быуат дауамын­дағы ише туған телебеҙ тотҡаһы, халҡыбыҙ өсөн рух сығанағы булып ҡалырбыҙ, ти­гән олуғ ышаныс йәшәй: гәзит сыҡ­ҡан, бөгөн дә сыға һәм киләсәктә лә сығасаҡ! Алға, “Башҡортостан”!

-  Гүзәлиә БАЛТАБАЕВА

Читайте нас в