Үҫеш мәктәбе булды

Билдәле шағирә, Ш. Бабич исемендәге республика йәштәр премияһы лауреаты, “Аҡбуҙат” журналының баш мөхәррире Лариса Абдуллинаны күптәр рухлы, илһөйәр, тормоштағы һәр күренешкә ҡарата үҙ фекере булған ҡыйыу, тынғыһыҙ ижадсы тип белә. Лариса Хашим ҡыҙының журналистикалағы хеҙмәт юлының тос ҡына өлөшө “Башҡортостан” гәзитенә лә арналды.

– Хәтеремдә, бала саҡта ауылыбыҙҙа өй һайын тиерлек “Совет Башҡортостаны” гәзи­тен ал­дырҙылар. Мин уны шул тиклем мөһим, кәрәкле баҫма булараҡ ҡабул итә инем, сөнки унда шундай олпат яҙыусы­ларҙың фекере, билдәле шә­хес­тәрҙең заман талабына яуап биргән һүҙе менән таны­шырға мөмкин ине. Артабан үҫмер, студент осоронда үҙем дә журналистик ижадҡа ныҡлы тотоноп киткәс, “Башҡортостан” ми­нең өсөн зауыҡ, кимәл тө­шөн­сәһен билдәләгән, заман­дың һүҙен әйткән, дәүләтсе­лектең иң ҙур талаптарын күтә­реп сыҡҡан баҫмаға әйләнде, – ти Лариса Хашим ҡыҙы.

Журналист булараҡ, Лариса Абдуллинаның “Башҡортостан” менән хеҙмәттәшлеге тап студент осоронда башлана – ул бында практика үтеп, ҡәләмен нығыта. 

Ғөмүмән, Лариса үҙе ме­нән бер осорҙа эшләгән хеҙмәт­тәштәре, баш мөхәррирҙәр, ижадҡа, һүҙгә мөнәсәбәте менән башҡорт милли матбу­ғаты кимәлен билдәләгән остаздары, фекерҙәш­тәре тура­һында ла ихлас, рәхмәтле фекерҙәре менән уртаҡлашты.

– “Башҡортостан” минең өсөн Башҡортостандың халыҡ шағиры Рәми Ғарипов, рухташым Рәйес Түләк эшләгән гәзит булыуы менән дә ҡәҙерле. Башҡортостандың халыҡ ша­ғиры Рауил Бикбаев баҫ­ма­быҙға айырыуса йылы мөнәсә­бәттә булды, “көнөмдө “Баш­ҡортос­тан” гәзитенән башлайым”, тиер ине ул. 80 йәшлек юбилейы уңайы­нан эшләгән тура бәйләнеш матур иҫтәлек булып ҡалды. Башҡортос­тандың халыҡ яҙыусыһы Нәжиб Асанбаев баҫма­быҙ аша халыҡ-ара, милләт-ара дуҫлыҡ төшөн­сәһен раҫлауға ҙур иғтибар бүлде. Был ҡиммәттең ни тиклем мөһим­леген бөгөнгө шарт­тарҙа тағы ла нығыраҡ аңлайбыҙ, – тип фекер­ҙәре менән уртаҡлашты Лариса.

“Башҡортостан”да эшләгән 12 йыл дауамында Лариса бул­маған берәй район йәки милләт­тәш­тәребеҙ күпләп йәшәгән ил төбәге ҡалдымы икән?! Ул – алыҫ Себер­ҙән Балтик буй­ҙарынаса барып етеп, башҡорт матбуғатын, шул иҫәптән “Баш­ҡортостан” гә­зитен танытҡан тын­ғыһыҙ йәнле ижадсы. Ҡайҙа ғына булмаһын, кемдәр менән генә осрашмаһын, Лариса иң тәүҙә аҫыл халҡыбыҙ, милли асы­лыбыҙ, бай та­рихыбыҙ һәм бөгөнгөбөҙ тура­һында үҙ һүҙен әйтә, миллә­те­беҙ­ҙең рухлы, ҡыйыу фекерле, тоғро ҡыҙы булып ҡала. Һәм әле лә, “Аҡ­буҙат” балалар журналының баш мөхәррире булараҡ, ошо изге мис­сияһын арымай-талмай дауам итә.

“Матбуғатта иң мөһиме – зама­ныңа кәрәкле фекер әйтеү”, – тигәйне Лариса әңгәмә барышында. Эйе, ул үҙ фекерен һәр ваҡыт ваҡытлы, урынлы һәм кәрәкле итеп әйтә белгән ижадсы булып ҡала.

- Гөлдәр ЯҠШЫҒОЛОВА